BULAWAYO - Abezemidlalo bakhulekela ukuba kube lengqubekela phambili kuloluhlangothi ngomnyaka ozayo.
Umdlali weqembu leBulawayo Chiefs, uLucky Ndlela, uthi umnyaka ka2022 awumenzelanga kahle njalo ngomnyaka ozayo uzaqhubekela phambili ngezifundo ukuze alungise ikusasa yakhe.
“Lonyaka bekungumnyaka onzima kakhulu kimi selokhu ngaba ngumdlali webhola. Ukumiswa kwelizwe lethu ukudlala lamanye amazwe kanye lesimo somnotho kwenze sibone angathi ikusasa lethu aliqhakazekanga. Ngomnyaka ozayo ngizaqhubekela phambili ngisenza izifundo zami zeMasters eNUST ngiphinde ngikhangele amathuba okwenza ibhizimisi.”
UNdlela wenza izifundo zesports science njalo ngo2010 wayeyingxenye yeqembu labasakhulayo abaleminyaka elitshumi lanhlanu eladlala kumidlalo yeYouth Olympics eyaqhutshelwa kwele Singapore.
Umqeqetshi womdlalo weTaekwondo, uVusa Ncube, uthi lonyaka badonse nzima kulumdlalo kodwa nxa kungahamba kuhle ngomnyaka ozayo bazawuphakamisa.
“Sifunde okunengi ngo2022 njalo sezilazo inhlelo esikhangelele ukuzenza ngomnyaka ozayo.
Lonyaka umdlalo kawuzange ukhule okutsho ukuba ngomnyaka ozayo kuzamele siphume ijumo sidinge abadlali ezikolo ngoba silohlelo olokwenza umncintiswano ozangenwa yizikolo ezitshiyeneyo ngoNhlangula.”
Umqeqetshi weqembu elitholakala elokitshini laseMakokoba eleBulawayo Tigers, uWilmot Kwenda, uthi bebekhangelelwa phansi njengamaqembu asebenza labasakhulayo.
“Lonyaka sisebenze kuhle kakhulu ngoba silabafana abathethwe liqembu leHighlanders njalo asebedlala kuqembu elikhulu. Ngomnyaka ozayo sikhangelele ukuba siqhubekele phambili silokhu sihwatsha abadlali bezinga laphezulu kodwa isikhalazo sethu ngesokuthi inhlanganiso yeZimbabwe Football Association isebenze lathi isiphathise ngoba yithi esivumbulula abadlali abasakhulayo.”
Abadlali abatshiwo nguKwenda abaphume kuqembu leTigers abathethwe liqembu elikhulu leHighlanders lonyaka ngababalisa uPrince Ndlovu kanye loGillian Nyathi.