BULAWAYO - Inhlanganiso yeFederation of International Football Association (FIFA) ngoLwesithathu yethule uluhlu lwabonompembe abazaphatha imidlalo eqoqwe ngaphansi kokuqondisa kwayo lonyaka njalo akula ngitsho loyedwa unompembe waseZimbabwe okhona.
Lokhu kungenxa yokuba ilizwe leZimbabwe limiswe ukuba lilunga lenhlanganiso yeFIFA nyakenye njalo amaqembu alo kanye labantu balo kabavunyelwa ukuphatheka kunhlelo zeFIFA.
Intathelizindaba yezemidlalo uNash Mkokwayarira uthi lokhu kuzaphazamisa kakhulu ingqubelaphambili yabo nompembe elizweni.
“Owayengunompembe uReginald Buhali, yena osengumqeqetshi njalo osebenza eselizweni laseBotswana, uthi vele lona uhlonzi lwabonompembe abakhona elizweni alusafani lakudala okokuthi sekungasetshenziswa lelithuba ukudinga abangcono.”
“Ukuze sibe labonompembe kuFIFA asiqaleni sime ukulwa uthole kuthiwa lowu ngumfana kabana kumbe ngokabani. Umfana olekhono kumele aphathiswe ayephambili kungakhathelekile ukuba ngumfana kabana ngoba khonokho okokuthi ngumfana kabana yikho okusibulalayo.
“Singabuyela emuva sikhangele ngesikhathi sabo Tangawarima labo Mukuna, sasisenza kuhle kakhulu ngoba wonke umuntu wayephiwa ithuba lakhe. Osekumele kwenziwe nje yikuthi kuqalwe kutsha, nxa kusenza bonabana abakudala baphenduke bezoncedisa laba abasakhulayo.”
Umdlali wenguqu uLucky Ndlela uthi ukuze isimo somdlalo silunge elizweni kuqakathekile ukuba inkokheli zomdlalo wenguqu zihlale phansi zibone ngasolinye.
“Mina bengifisa ukuba abakhokheli belungise indaba lezi. Sikhalela ukuba babe ngabantu abalolwazi ngoba kunzima ukuba umuntu ongela lwazi lezinto zebhola ayenze izinto zebhola njalo lokho kudala ukuba kube lokungahambi kuhle kwezinto.,”
Ilizwe leZimbabwe limiswe ukuba lilunga lenhlanganiso yeFIFA nyakenye ngemva kokuba inhlanganiso yeSport and Recreation Commission imise umsebenzi ibhodi yeZimbabwe Football Association ekhokhelwa nguFelton Kamambo ngomnyaka ka 2021 ibethesa umlandu owokwehluleka ukuqhuba umdlalo wenguqu ngemfanelo elizweni.
UGift Banda nguye okhethwe zinkokheli zomdlalo elizweni ukuba akhekhele inhlanganiso yeZifa kodwa inhlanganiso yeFIFA yona ithi eleZimbabwe lizavunyelwa ukuba lilunga layo lingabisela esikhundleni uKamambo labanye bakhe.