HARARE - Umphathintambo wezemithetho, uMnu. Ziyambi Ziyambi, ngoLwesihlanu wethulele idale lephalamende okusemthethweni ugwalo olujulileyo olwe-Preliminary Delimitation Report.
Ukwethulwa kogwalo olujulileyo lolu kuza ngemva kokuba abe Zimbabwe Electoral Commission (ZEC) bethulele ugwalo lolu uMongameli Emmerson Mnangagwa kulandelwa isisekelo sombuso welizwe.
UZiyambi uthe, “Ngakho ke mina njengomphathintambo wezemithetho sengiyibeka phambi kwedale leNational Assembly iZEC Preliminary Report ukuthi ikhangelwe.”
Idale lephalamende lizahlolisisa ugwalo lolu lilandela isisekelo sombuso welizwe.
Kubunjwe ikhomithi ezahlolisisa ugwalo lolu ezakwethula ekutholileyo ngoLwesihlanu.
Abakumabandla aphikisayo bakhonona ngesimo sekhomithi le besithi igcwele amalunga akubandla leZanu PF njalo kungani ugwalo lolu aluqhutshwanga ngemfanelo.
Bathi bazakwethula abakubonileyo ikhomithi ebunjiweyo isihlolisise ugwalo lolu.
UMnu. Prince Dubeko Sibanda, okubandla leCitizens Coalition for Change, uthi, “Okukhona yikuthi i-Report yeDelimitation lamhlanje ifike yabekwa phambi kwedale lephalamende njalo amalunga edale lephalamende okwakuqala asethole ithuba lokuthi beyibone leyo Delimitation Report, iPreliminary Report yakhona ukuthi injani. Le ad hoc committee yakhona yeDelimitation layo yasiyanelisa ukuthi ihlangane okwakuqala namuhla.”
USibanda uqhubeke esithi bazokwenelisa kuphela ukutsho umbono wabo lapho sebethe bayikhangelisisa ngokugcweleyo njengebandla.
Ikhomithi ezahlolisisa ugwalo lolu olujulileyo ikhokhelwa nguMnu. Pupurai Togarepi, obona ngokwenzakala kubandla leZanu PF edale lephalamende.
Ugwalo lolu liveza ukuba kuzaqhubekela phambili kulezigaba ezedlula amakhulu amabili – 210 constituencies. Ezinye izigaba zibanjaniswe lezinye ngenxa yenani eliphansi labavoti kuthi njalo kwengezwe ezinye okulabantu abanengi ababhalisela ukuvota.
Lolugwalo lwePreliminary Delimitation Report lutshengisa ukuba isigaba seHarare sesilezigaba loba amaConstituencies angamatshumi amathathu njalo izigaba ezinjenge Warren Park leseKambuzuma, kazisekho.
Isigaba seHarare sesilezinye ezintsha ezigoqela eseHunyani, Churu, Budiriro North leSouth kube sekusiba leseEpworh North leSouth.
Isigaba seMasvingo lokhe silamaConstituencies angamatshumi amabili lasithupha lanxa isigaba seGutu South singasekho.