BULAWAYO - Umqeqetshi womdlalo wevolleyball olodumo, uVulindlela Moyo, uthi ukuphenduka kwemidlalo yezikolo kuzaphathisa iqembu lakhe eleSpartans ukuthi livumbulule abadlali abatsha libuyele njalo libe zintshantshu ngemva kokuba liqhube nzima nyakenye.
UMoyo uthi ukuvunyelwa ukuba imidlalo yezikolo idlalwe ngemva kweminyaka embalwa ingadlalwa ngenxa yomkhuhlane weCOVID-19 kuzanceda iqembu lakhe lona elidinga abadlali abatsha.
“Nyakenye iqembu leSpartans kalidlalanga kumbe, imbangela kuyikuba abadlali abanengi basukile eqenjini lethu besiya kumaqembu akade ebathembisa izinto thina esingelazo.
“Thina njengeSpartans sifisa ukuba sithole abadlali abalesifiso esokudlala umdlalo wevolleyball ikakhulu ezikolo lezi esezivunyelwe ukuba ziphatheke kwezemidlalo nguhulumende. Sikhangelele abasakhulayo abaleminyaka elitshumi lantathu kusiya kumatshumi amabili abagoqela amankazana labafana. Sifisa ukubafundisa umdlalo wevolleyball sithuthuke njengoBulawayo.”
UMoyo ungezelele wathi okunye osekwenza iqembu lakhe labesifazane lingasanqobi njengakudala yikuba abadlali abanengi aqalisa labo iqembu batshiya sebesiyakwenda.
“Sibe liqembu leSpartans ngo2005 njalo sadlala saqina kakhulu emankazaneni ngoba besinqoba kumncintiswano welizwe lonke kusukela ngo2006 kwaze kwaba ngu2012.
“Sihambe lakuZone VI sathola imendulo eyombala wethusi. Sihambe njalo sayancintisa lasemazweni abalisa eleSwaziland kanye leLesotho saphenduka siphethe imendulo kanye lemali. Kusukela ngo2014 besizama ukudlala kodwa omama abanengi bakhethe ukuyakwenda njalo lokhu kutshiye iqembu lethu lingasaqinanga.
“Iqembu labafana lona lidlale kuhle kungakabi lomkhuhlane weCovid ngo2017 lo2018 lapho esicine khona sithola isicoco sumbala wesiliva kumncintiswano welizwe lonke ikanti lapha koBulawayo besiqeda imidlalo yethu singanqotshwanga kusukela ngo2015 kusiyafika ngo2019 lapho imidlalo emiswe khona.”
UMoyo uthi ezikolo yikho lapho okutholakala khona abadlali bakusasa njalo ukungabi khona kwemidlalo yabasakhulayo sekuphazamise kakhulu ingqubelaphambili yezemidlalo elizweni.
“Okumqoka yikubuyela ezikolo ngoba nxa usakha uqalela phansi. Abanengi besebekhangela abadlali abavele sebelolongiwe bekhohlwa ngabasakhulayo njalo khonokho sekudale ukuba amaqembu abe malutshwane koBulawayo ngoba abanengi abalolongwa kudala sebayekela ukudlala.
“Eyinye into esibulele umdlalo yikungabi khona kwemidlalo yabasakhulayo eyeNational Youth Games ngoba abadlali bethu bebelolongwa besiyadlala kumidlalo leyi bahle baqhubekele phambili.”
Uzanazelela ukuba yonke nje imidlalo isiwile ngoba akusela imidlalo yabasakhulayo.
Iqembu leSpartans lisebenzisa indawo kaloliwe eyeRaylton Sports Club njalo ngoMgqibelo iziphathamandla zeqembu kanye labadlali bebecenta inkundla belungiselela ukuqala ukuzilolonga phambilini kokuqala kwemidlalo yalonyaka.
UMoyo ngumqeqetshi ohamba phambili elizweni laseZimbabwe njalo useqeqetshe amaqembu amanengi kuminyaka efika phose amatshumi amathathu njalo lawa ngabalisa elabesifazane elimela ilizwe.