Washington DC................
Ibandla le-CCC, lethule umbiko besipha umbono wabo, mayelana logwalo lwemingcele yokhetho, olwe-delimitation.
Isikhulumeli sebandla leli, uNkosazana Fadzayi Mahere utshele umhlangano lentathelizindaba eHarare, ukuthi ibandla lakhe kalisuthiseki ngogwalo lolu.
Uqhubeke ethi bafuna ukuhlolisisa ugwalo lwe-voters roll kuqala, bekhangelisisa ukuthi luhambelana lolwemigcele olwe-delimitation na. UMahere ubuye wathi bakhathazeka ngokungalandelwa kwesisekelo sombuso welizwe, ngoba inani labantu abavotayo kumele lilingane isigaba ngasinye, i-constituency. Nxa lokhu kungenzakalanga, akumelanga libe linani elinengi kumbe elilutshwana okuyisilinganiso esedlula amatshumi amabili ekhulwini - 20%.
Uthi isisekelo sombuso welizwe sikubeka sobala ukuthi ugwalo lwe-delimitation nxa lungakhitshwanga kulenyanga eziyisithupha andubana kuqhutshwe ukhetho, kungasetshenziswa ugwalo olwasetshenziswa ekhethweni olwedlulayo. Okugcizelelwe ngumsekeli wakhe uMnu. Gift Ostalos Siziba esixoxe laye ecingweni ese-Harare.
"I-press conference yethu besikhangela ke indaba ye-delimitation report. Sibonisa uzulu wonke ukuthi sesi-analyzile i-report. Sikhiphe i-statement sethu esitshengisa ukubana kulenkinga ngaphi langaphi; ikakhulu eyoku-apportioner kwama-seats e-parliament, lendawo ke kuma-khansili amanengi; ikakhulu emadolobheni." kutsho uMnu. Siziba
