Bulawayo...................
Owayengunozinti weqembu leHighlanders uJohannes Tshuma useqale isikolo sokuqeqetsha onozinti abasakhulayo edolobheni lakoBulawayo.
UTshuma, owaba ngunozinti wamaqembu abalisa eleEagles, eleWankie, eleHighlanders kanye leqembu labesilisa elimela ilizwe emdlalweni wenguqu, uthi inhloso yakhe yikusebenzisa ulwazi lwakhe afundise abasakhulayo ukuba babe ngonozinti bakusasa abakuzinga laphezulu.
“Into engiyenzayo yikuthi ngifundise abantwana laba ukuba ngabonozinti abahle abakusasa. Angikhethi ukuthi bavela kuliphi ilokitshi, ingqobe yikuba babe ngabakoBulawayo. Ngisebenza labafana abaleminyaka esuka kweyithoba munwe munye kusiya kuminyaka engamatshumi amabili lantathu. Lamantombazana lawo nxa efuna ukuthi azofundela ukuba ngonozinti labo ngiyabavumela ukuba babuye,” kutsho uTshuma
UTshuma usebenza ndawonye lowayengumgadli olodumo uTobias Mudyambanje yena othi ngokuhamba kwesikhathi bazasebenza labanye abadlali abasakhulayo abadlala phakathi kwenkundla.
“Uhlelo lolu silwenza ngoba sicabange ukuthi sihle sifundise abantwana laba besasebancane. Sicabange ukuthi siqale ngabonozinti ngoba siloSamaTshu, ongomunye wabonozinti abezinga laphezulu elizweni njalo imfundiso yakhe izabaphathisa kakhulu abasakhulayo. Sihlale phansi sakubona ukuba unozinti akadlali yena yikho sesizaqala ukusebenza lemvimbi, siye kubadlali benkabeni yenkundla kanye labagadli. Asikhethi ukuba umdlali uvela ngaphi kodwa esikufunayo yikuba sifundise abantwana laba ukuze nxa besiyadlala lapho abadlala khona bayenze izinto ezifaneleyo,” kutsho uMudyambanje.
UTshuma loMudyambanje bake baqhuba uhlelo olufanayo nyakenye ngenyanga kaMpalakazi njalo uTshuma uthi kusiya phambili seluzakuba yinto yamaviki wonke.
“Angifisi kuphelele khonapha kodwa ngifisa kuqhubekele phambili. Njengoba ubona abafana laba bebuyile kanje, bazaphinda babuye njalo phakathi kweviki langempelansonto. Kuyo yonke impelaviki ngoMgqibelo langeSonto sizabe silwenza uhlelo lolu kuze kuphele umnyaka siyeqele emnyakeni olandelayo nxa uNkulunkulu esiphathisile,” kutsho uTshuma.
Uhlelo oluqhutshwe ngoMpalakazi luqhutshelwe endaweni yeCrescent kodwa lolu oluqhutshwe kulimpelaviki lube sesikolo seMckeurtan.
UTshuma uke waqeqetsha amaqembu abalisa eleHighlanders kanye leleTalen Vision engumqeqetshi wabonozinti ikanti uMudyambanje uke waqeqetsha amaqembu abalisa eleRailstars, eleZim Leopards kanye lamanye.
Facebook Forum