Harare....................
Abebandla leCitizen’s Coalition for Change ababotshwe ngoMggibelo, abangamatshumi amabili lanhlanu-25, bamiswe phambi komthethwandaba kaMantshi, eHarare Ngomvulo, besetheswa icala lokuqhuba umhlangano ongekho emthethweni emzini womeli weBudiriro edale lephalamende, umnumzana Costa Machingauta.
Phakathi kwababotshiweyo laba kubikwa kulontombazana oleminyaka elitshumi lasikhombisa kanye lamaxhegu lezalukazi ezimbalwa, abaveza ukuba bebehlukunyezwa ngesikhathi bevalelwe eHarare Central Police.
Lokhu kuvezwe ligqwetha elimela ababotshiweyo laba Umnumzana Chris Mhike othe bebekhala ngokuncitshwa ukudla, kanye lokuthi kubotshwe lokutshaywa kakubi kwegqwetha ebelisiya basiza izolo umnumzana Kudzai Kadzere ocine esephulwa isandla ngamapholisa.
Unkosazana Yeukai Dzuda nguye umantshi kuloludaba, abatshutshisi kungu Mnu Dziva lo Mnu Bofu. U-Mhike uthi ababotshiweyo laba bebesalelwa ukubonana lamagqwetha abo.
Luphinde lwabuyela njalo emini udaba lolu lapho iqgwetha uMnu Wilbert Madinde achasisa ngokubotshwa kwabo.
Umsekeli wesikhulumeli se CCC uMnu Felix Mafa uthi ukubotshwa kwabasekeli be CCC kuphazamisa umsebenzi webandla leli.
Amagqwetha athi ayaphikisa ukubotshwa komntwana oleminyaka elitshumi lasikhombisa-17 befuna akhululwe hatshi ukuvalelwa.
Abalandeli beCCC abagoqela isiphathamandla salelibandla, basole kakhulu ukwalelwa kwabo ukungena emthethwandaba kaManshi lapho lelo cala lithoniswa.
Intathelizindaba ezisebenza zizimele lazo ziyalelwe ukungena emthethwandaba ekuseni ngesikhathi beqala ukumiswa phambi kwawo okuyinto esolwe ngamagqwetha wona acine eluphakamisa loludaba phambi kukaMantshi, bavunyelwa ukungena kuhlandla lemini, okubangele ukukhonona kwamagqwetha.
Ingane eleminyaka elitshumi lasikhombisa- 17 icine ikhululwa lidale wanikezwa kubab’omncane wakhe, ekuphindeleni kwaloludaba emthethwandaba emini.
Udaba lokucela ukutholiswa ithuba lokuhlawula imali yesibambiso ibail luzaqhubeka Ngolwesibili.
