JOHANNESBURG - Inhlanganiso yeOperation Dudula ithi isisungule uhlelo lokuhamba ezikolo ikhankasela ukukhitshwa kwabantwana bezizalwane zakwamanye amazwe abafundayo khona kulabantwana baseSouth Africa abaswela indawo.
Umgcinisihlalo walinhlanganiso eJohannesburg uMnu Sipiwe Shabalala utshele iStudio 7 ukuthi basungule loluhlelo ngemva kokubona ukuthi kulabantwana abanengi bakweleSouth Africa abangakatholi indawo zokufunda ngoba sezithethwe ngabokuza.
“I-campaign yethu yenza ukuthi abantwana beSouth Africa bathole izikolo, kungabi le-situation la bahleli ngaphandle abana-space ezikolweni while abantwana bama-foreigners basezikolweni ze-government. Mainly si-targeta ama-government schools,” kutsho uMnu Shabalala.
Lumkhankaso ususolwe kakhulu ngabazali lenhlanganiso ezimela izizalwane zeZimbabwe kweleSouth Africa.
Omunye wabazali laba ngumgcinisihlalo wenhlanganiso yeZim Imbokodo, uNkosazana Victress Mathuthu, yena othi, “abazali bakhathazekile. Bayethukile.”
“Kunzima futhi lokuthi abantwana baye esikolweni, labazali kunzima kubo ukuthi bathumele abantwana esikolweni ngoba abazi ukuthi labo bantu bedudula bazofika nini ezikolweni zabo.”
Imizamo yokukhulumisana labogatsha lwezemfundo ngaloludaba yehlule.
Kodwa umsekeli kamqondisi walolugatsha uMnu Terrence Khala, usanda kutshela abezindaba ukuthi ukwenqabela umntwana yiloba nguphi ukuthi afunde yikwephula umthetho weSouth Africa.
“Njengogatsha lwezemfundo semukela wonke umntwana loba ulamaphepha kumbe kalawo,” kwatsho uMnu Khala.
Kulezinkulungwane zabantwana beZimbabwe abafunda ezikolo zakweleSouth Africa.
Inengi labazali balaba bantwana selike lahlaselwa kudlakela lwe-xenophobia oluhleli luqhamuka. Kodwa inhlanganiso yeOperation Dudula ithi uhlelo lwayo lolu aluhlangani le-xenophobia.
