amalinks wokungena

Breaking News

Useli 'Ninja' uSweswe


Lizwe Sweswe
Lizwe Sweswe

ULizwe Sweswe, umqeqetshi omutsha oweqembu lomdlalo wenguqu eleBulawayo Chiefs, uthembisa ibhola elinathisa amanzi.

USweswe, osanda kuqhatshwa ukuba ngumqeqetshi omutsha oweqembu leBulawayo Chiefs, uqala umsebenzi kusasa koBulawayo. Lumqeqetshi uthi uyathokoza kakhulu ukuba usephendukile njalo ukuzoqeqetsha kusigaba sePremier Soccer League.

“SengikuBulawayo Chiefs, Amakhosi, khonapha edolobheni lakoBulawayo, kusigaba sePremier League. Into engiyithandayo mina emsebenzini wami yikuba abantu nxa bebuye bezobukela bakholise. Angijimisi impumela kuphela kodwa yebo siyawadinga kodwa ibhola kumele lithokozise abantu njalo into engingayithembisa abalandeli yikuba bazabona ibhola elimnandi,” kutsho uSweswe.

USweswe ubeqeqetsha iqembu leTalen Vision lona elidlala kusigaba seSouthern Region Division One Soccer League. Uthi uza kuqembu leBulawayo Chiefs labanye abaqeqetshi akade esebenza labo ababalisa uSithethelelwe ‘Kwinji’ Sibanda, ongumqeqetshi weqembu labesifazane elimela ilizwe eleMighty Warriors.

“Ngilabantu vele engihamba labo emsebenzini wami lowu yikho esikhathini esinengi ngiyabe ngifuna ukuba ngibe labo. Okwakhathesi uKwinji uyabe engekho ngoba usebenza lenhlanganiso yeCAF kanye leyeFIFA efundisa abaqeqetshi yikho uzaze abekhona sisebenze laye ngenyanga kaNkwenkwezi. Okwakhathesi ngizahamba losakhulayo emsebenzini wokuqeqetsha uHeritein Masuku engizama ukuthi laye ngimphakamise kulumsebenzi,” kutsho uSweswe.

Iqembu leBulawayo Chiefs liphutshe lisendaweni yesikhombisa engalaneni yemiklomelo ekupheleni kwemidlalo yanyakenye laphinda njalo laphakamisa lenkezo yeChibuku. USweswe uthi uyakwazi ukuba abalandeli bomdlalo wenguqu bakhangele ukuba leliqembu lizakwenza njani lonyaka ngemva kokudlala kuhle nyakenye.

“Ungathi uyakhangela kulabadlali abambalwa abasuke bahamba okutsho ukuba kufana lokuthi mina sengisiyakwakha futhi kakutsha. Ngiyazi abantu sebezasebenzisa indlela iqembu elidlale ngayo nyakenye njengesilinganiso kodwa isifiso sami ngesokuba sibone ngaso linye elokuthi lapha siyakha,” kutsho uSweswe.

USweswe ulobelane isivumelwano somsebenzi eseminyaka emithathu leqembu leBulawayo Chiefs. Lumqeqetshi wenze izimanga ngomnyaka ka2014 lapho aze angenise iqembu leTsholotsho kusigaba sePremier Soccer League.

Ekusukeni kwakhe kuqembu leTsholotsho, usebenzele iqembu leFC Platinum njalo nguye obeziphethe esidukwini ngomnyaka ka2019 lapho leliqembu eliphakamise khona isicoco seLigi.

XS
SM
MD
LG