amalinks wokungena

Breaking News

UMapeza Kazihluphi Ngokungangeni Kweqembu leFC Platinum Emidlalweni Yezwekazi leAfrica


Norman Mapeza
Norman Mapeza

Umqeqetshi weqembu lomdlalo wenguqu eleFC Platinum, uNorman Mapeza, uthi akalahlekelwa yibuthongo ngokungancintisi kweqembu lakhe kumncintiswano wokudinga intshantshu zwezwekazi leAfrica.

Ekhuluma lentathelizindaba zemidlalo esedolobheni lakoBulawayo lapho iqembu lakhe elizilolonga likhona phambilini kokuqala kwemidlalo yalonyaka, uMapeza uthe iqembu lakhe kalikafiki ebangeni lokuthi selingaqhudelana lentshantshu zakwamanye amazwe.

“Kuyadanisa ukuba asenelisi ukuncintisa lathi kuzwekazi laseAfrica kodwa nxa sesikhuluma iqiniso thina sisemuva kakhulu njengelizwe nxa uqathanisa lamazwe afana leMorocco.

Ungakhangela okwenziwe lilizwe leMorocco kumidlalo yezizwe zomhlaba kuyisibonakaliso salokho okwenziwa ngamaqembu akulelo. Singahamba siyencintisa kuzwekazi leAfrica kodwa kusizani ukuyatshaywa kabuhlungu sicine singasazithembi?”

Iqembu leFC Platinum nyakenye likhulule abadlali asebekhulile abake baphatheka kumncintiswano owkudinga intshantshu zezwekazi leAfrica njalo uMapeza uthi akumelanga ajahe laba abasakhulayo aselabo loba nje beyenelise ukuphakamisa isicoco seCastle Premier Soccer League.

“Asikakulungeli ukuyancintisa kuzwekazi leAfrica. Akumelanga sibambe inhlwa ngekhanda kodwa kumele kube khona lapho esiqalela njalo sibumbe kancane kancane. Ngaleso sizatho angifuni ukuthi siyencintisa ngoba ngingakholelwa ukuba sesikulungele lokho. Abanye bengathi siyabe sisiyafunda kodwa singadliwa kabuhlungu kungasiphazamisa kakhulu.”

UMapeza uthi kuzamele kuvuselelwe imidlalo yabasakhulayo ukuze umdlalo wenguqu kweleZimbabwe uthuthuke, amaqembu akuleli lawo ayenelise ukwenza kuhle.

“Nxa kungathiwa sesivunyelwe ukudlala lamanye amazwe njalo kumele iqembu lamajaha aleminyaka engaphansi kwamatshumi amabili liye dlala lelinye ilizwe siyabathatha ngaphi abadlali bakhona?

“Kumele inkokheli zomdlalo wenguqu ziqale inhlelo zokuba kube le ligi yamaqembu amajaha aleminyaka engaphansi kwamatshumi amabili edlalwa kanye kanye lemidlalo yePSL.

Sithi thina njengeqembu leFC Platinum singayadlala leHwange sihambe labafana bethu baqale bona ukudlala. Kumele sibe leligi yabadlali abasakhulayo kusukela kwabancane kuze kufike kwasebethe hluthu.”

Iqembu leFC Platinum yilo eliphakamise isicoco seligi ekupheleni kwemidlalo yanyakenye njalo lokhu bekungokwesine ukuba liphakamise inkezo le.

Ngokunjalo lizadibana lele Bulawayo Chiefs lona eliphakamise inkezo yeChibuku Super Cup ngenyanga kaNhlolanja emdlalweni weCastle Challenge Cup oyiwo ozasungula imidlalo yalonyaka eyesigaba sePremier Soccer League.

XS
SM
MD
LG