Umeli weZengeza West edale lephalamende engowebandla leCitizens Coalition for Change, uMnu. Job Sikhala, okubikwa ukuba uyagula okumangalisayo, kenelisanga ngoLwesine ukuya emthethwandaba lapho athoniswa icala lokutshotshozela udlakela.
USikhala, olilunga leCitizens Coalition for Change njalo osehlale inyanga ezedlula eziyisikhombisa eChikurubi Maximum Security Prision emelele ukuthoniswa icala aletheswayo, kubikwa ukuba wehluleke ukungena emoteni ethwala izibotshwa.
Abalondoloza izibotshwa emajele abangathandanga ukubethwa ngamagama bathi uSikhala wehluleke khona ukugada imota ethwala izibotshwa ngenxa yokugula kwakhe. Abatshutshisi bathe bakubone kufanele ludluliselwe phambili loludaba.
Elinye Iamagqwetha kaSikhala, uMnu. Harrison Nkomo, uthi sebegijigijima ukuthi babone ukuba uthola usizo ngesiphangiphangi.
“I-case yakhona lamhlanje ayisaqhubekanga ngoba ubengekho. Sizoqhubeka mhlaka 9 Nhlolanja. Abamgcinayo ngale eChikurubi Maximum Prison bathi kezwa kuhle. Thina asikamboni okwamanje, yikhona sizakuya khona eChikurubi siyebona ukuthi uzwa njani.”
UNkomo uthi bakhathazekile kakhulu ukuba imithethwandaba iqhubeka ilokhe imcitsha ithuba lokuthi ahlawule isibambiso se-bail.
USikhala usenze imizamo elitshumi lambili yokucela ukuba avunyelwe ukuhlawula i-bail kodwa imthethwandaba kamantshi loweHigh Court imalela kuzo zonke izicelo.
“UJob Sikhalla akasimuntukazana, uSikhala nguMember of Parliament weZengeza West Constituency, uSikhala ligqwetha, bekumele ama-courts lawo bakuthathe njengomunye wabo. Yisifiso sethu thina njengamagqwetha ukuthi hayi, amalungelo akhe ahlonitshwe lidale. Kodwa sizakubona, lathi sizayenza konke esikukwanisayo ukuthi simkhuphe ejele.”
USikhala wake wabonwa ngabodokotela bakhe kanye labakahulumende ekhonale entolongweni kumaviki ambalwa edluleyo.
Kasisanelisanga ukukhuluma lesikhulumeli sohlangothi lwamajele olweZimbabwe Prisons and Correctional Services, uNkosazana Meya Khanyezi, obengaphenduli umakhelekhukhwini.
USikhala ubotshwe nyakenye esetheswa umlandu wokutshotshozela udlakela ngemva kokuthunjwa lokubulawa kuka Nkosazana Ali ngocatshangelwa ukuba ulilunga ebandla leZanu PF, uPius Jamba Mukandi, ovuma icala leli.