Umphathintambo wogatsha lwezemali kweleMelika, uNkosikazi Janet Yellen, uqhube eminye imihlangano ngoLwesine kwele South Africa kuhambo lwakhe lokuqinisa ubudlelwano bamazwe womabili kwezamabhizimusi.
Bekulusuku lokusebenza gadalala kumphathintambo Yellen njengoba eqede ilanga lonke engena imihlangano etshiyeneyo.
UNkosikazi Yellen wethekelela eleSouth Africa ngenhloso yokuthuthukisa ukudlelana kwamazwe womabili kwezamabhizimusi.
Usuku lwakhe luqale ekuseni lapho ahlangane khona lomphathintambo wogatsha lwezemali kwele South Africa, uMnu. Enock Godongwana.
Kulo umhlangano ababili laba bakhulume ngesimo sezomnotho wakweleSouth Africa ontengantengayo, ukusweleka kwamandla kagetsi osekuhluphe kakhulu, lokunye okuphathelene lezomnotho.
UNkosikazi Yellen uthe kuqakathekile ukuthi eleSouth Africa lithole isisombululo sohlupho lwamagetsi.
"ISouth Africa ngelinye lamazwe asesungule inhlelo zokugaywa kwamagetsi angelangozi emkhathini ngokusebenzisana leMelika. Lokhu kusasiza kakhulu ekuthuthukeni kwezomnotho."
Kunkulumo yakhe kulo umhlangano uGodongwana uthe iMelika ilobudlelwano obuhle kakhulu leSouth Africa.
"IMelika ngelinye lamazwe aphezukwawo wonke kwezokuthengiselana leSouth Africa. Lokhu sifisa kuqhubeke ngoba kusiza umnotho wethu."
Ngemva kwalo umhlangano umphathintambo Yellen uyekusidlo semini lomeli weMelika kwele South Africa, uMnu. Reuben Brigety, kanye lenkokheli zamabhizimusi kwele South Africa leMelika.
Laphake kukhulunywe ngamathuba okuqhuba amabhizimusi lendlela zokuwaxhasa.
Usuke lapho wethekelela inkampani yezimota IFord Motor company eseduze lePretoria. Inkampani yeMelika le iqatshe abantu abedlula izinkulungwane ezine (4000) kwele South Africa.
UNkosikazi Yellen uphethe usuku ngokuqhuba umhlangano losibalukhulu webhanga lesizwe kweleSouth Africa, uMnu. Lesetja Kganyago.
Limihlangano yengeza kwayiqhube ngoLwesithathu loMongameli Cyril Ramaphosa, abaphathintambo bakwele South Africa kanye lomunye lapho ahlangane khona lengcitshi kwezokubulawa lokuthengiswa kwenyamazana zendle ngokungekho emthethweni.
Kusasa uzaphetha uhambo lwakhe ngokwethekelela isabelo seMpumalanga esigcwele iziphala ezipheka amagetsi amalahle.
UNkosikazi Yellen ukuhambo lwakhe lwakuqala lokwethekelela amazwe awezwekazi leAfrica lokhe wabekwayo kulesi sikhundla nguhulumende kaMongameli Joe Biden weleMelika.
Kwele South Africa usegqiba uhambo lwakhe lolu oluqalele kwele Senegal, wasuka lapho waya kwele Zambia andubana aze emzansi Africa.