Ukuxotshwa kwamankazana ayisitshiyangalombili, 8, ekade eqhuba izifundo zikaUpper 6 esikolo seDominican Convent, eHarare, ngemva kokubanjwa esebenzisa okudakayo sokuphehle imbono etshiyeneyo, inhlanganiso yababalisi bemaphandleni, iAmalgamated Rural Teachers Union of Zimbabwe (ARTUZ), isithi umlayo kahulumende ovimba ukutshaywa kwabantwana besikolo yiwo obangela ukuthi babe ngamahlongandlebe.
Umphathisikolo weDominican, okuyisikolo samaKatolika, uSister Kudzai Mutsure, ulobele abazali incwadi kuliviki ebazisa ukuthi abafundi laba basebenzisa okudakayo angakubethanga ngegama beze bethekelele eNyanga kumaviki amabili edluleyo.
Abantwana laba basebemisiwe ukuza esikolo yiziphathamandla zisaphenya loludaba. Kodwa uMutsure uthe sebexotshwe kokuphela ngemva kokufunyanwa belamacala. Ukhuthaze abazali babantwana laba ukuthi babadingele usizo lwenhlelo ezingabaphathisa ukuthi batshiyana lokudakayo.
Ukusetshenziswa kwezidakamiswa ezifana le-cocaine, chrystal meth, insangu kanye lotshwala obungavunyelwano ngabasakhulayo sokubhahe kakhulu eZimbabwe ngitsho lasezikolo.
Lanxa abanye abazali besithi ngabe isikolo lesi sibaxolele abafundi laba babhala imihloliso njengobe bengoUpper 6, abanye bathi ukuxotshwa kwabo ngumzekeliso omuhle ozalaya abanye abafunndi ukuthi baziphathe.
Kodwa isikhulumeli senhlanganiso yeAmalgamated Rural Teachers Union of Zimbabwe uMnu Thembakuye Moyo uthi ukwaliswa kwababalisi ukutshaya abantwana nguhulumende yikho okwenza abanye babo babe ngumhlambi kazelusile.