Amalunga ebandla leCitizens Coalition for Change (CCC), abevalelwe enkambeni yamapholisa emelele ukuthoniswa amacala okwenza umhlangano okungekho emthethweni, avunyelwe namuhla ngumantshi eHarare ukuba ahlawule isibambiso se-bail.
Inhlanganiso yeZimbabwe Human Rights NGO Forum yethule umbiko lo enkundleni yokuxhumana eyeTwitter isithi amalunga la angamatshumi amahlanu abemelwe nguAdvocate Wilbert Mandinde, uMnu. Isheanesu Chirisa bebambisana loAdvocate Chris Mhike, uMnu. Kudzai Kadzere loMnu. Tamutswa Muzana.
Ilunga linye ngalinye levunyelwe ukuhlawula inkulungwane ezingamatshumi amadola eZimbabwe – ZWL$30,000 njalo lokuthi kumele behambe enkambeni yamapholisa maviki wonke ngoLwesihlanu.
Bebebotshwe lamalunga edale lephalamende okuthiwa aqoqa umhlangano eBudidiro okungekho emthethweni.
Amagqwetha abo athi kuyamangalisa ukuba abantu laba bebevalelwe kulokuthi bethoniswe bevela ezindlini zabo.
Amalunga la agoqela umeli weBudiriro edale lephalamende, uMnu. Costa Machingauta lomela iMkoba, uMnu. Amos Chibaya.
Ababili babo asebekhulile, omunye oleminyaka engamatshumi ayisitshiyangalombili lanye - 81, loleminyaka engamatshumi ayisikhombisa lambili – 72, abakhululwe bengahlawuliswanga. Omunye osakhulayo oleminyaka elitshumi lasikhombisa – 17, wakhululwa ngeviki ephelileyo engahlawuliswanga.
Inani labasolwa bonke ababotshelwa ukuphatheka kulumbuthano lifika ku-26.
Amalunga aweCCC la, abotshwa esemhlanganweni endlini yomeli weBudiriro edale lephalamende, etheswa icala lokubuthana okungekho emthethweni, kodwa bona bayalilandula lelicala, besithi babebuthene endlini ngasese, hatshi empakathini. Ngakho-ke kabephulanga mthetho.
Bakhangelelwe ukubuyela emthethwandaba kamantshi, uNkosikazi Yeukai Dzuda, mhlaka 3 Nhlolanja, ukwenzela ukupha amapholisa ithuba lokugqiba uphenyo lwabo ngaloludaba.
UNkosazana Precious Nomzamo Ndlovu, ilunga leCCC, bekungamelanga kubotshwe abantu laba.
“Okokuqala, angingeke ngithi siyajabula, ngoba vele besingamelanga kubotshwe ekuqaliseni. Ukubotshwa kwabo, kumbe ukuswela i-bail, kumbe ukufikelwa ngamapholisa besmhlanganweni wangasese, endlini yomuntu, vele akukho emthethweni khona ngokwakho. Ngoba uSection 2 weMaintanance of Peace and Order, uChapter 11 wakhona lo okhona kavumi ukuthi amapholisa afike endaweni engasese abantu abayenzela kiwo umhlangano.”
UMaNdlovu uthe ibandla leZANU-PF liduba ngokuthi lingabona ukuthi seliswele indawo kumbe they are losing ground nesiNgisi libuyela kuma-default settings, awokwethusela abantu, ukuzama ukubantshintsha inqondo, ukubana basekele elabo ibandla. Uthe kakusoke kwenzakale lokho ngob abantu sebekhathele nge-ZANU-PF.
Kusenjalo, uMnu. Job Sikhala oselenyanga ezedlula eziyisikhombisa evalelwe eChikurubi Maximum Security Prison, kubikwa ukuba wehluleke ukuya emthethwandaba ngoLwesine ngenxa yomkhuhlane. Akwaziwa ukuba ulomkhuhlane bani.
USikhala wetheswa icala lokutshotshozela udlakela eNyatsime kulandela ukubulawa kuka Nkosikazi Moreblessing Ali ngabacatshangelwa ukuba ngamalunga ebandla leZanu PF.
Isidumbu sika Nkosikazi Ali sisendlini yamakhaza eChitungwiza General Hospital.