Basele bekhuza umhlola abalandeli beqembu leHighlanders ngemva kokuba iqembu leli lehluleke ukubabikela ukuba lisebenzise njani imali nyakenye.
Iqembu leHighlanders liqhube umhlangano walo eliwuqhuba minyaka yonke ekuqaleni komnyaka namuhla njalo indaba esele isematheni abalandeli baleliqembu yikungenelisi kwalo ukubazisa ukuba imali isetshenziswe njani emnyakeni ophelileyo. Ekhuluma ekupheleni komhlangano, unobhala jikelele weqembu leHighlanders, uMorgen Gazza Dube, uthe lokhu kudalwe yikuba kukhona ingcwethi ezihlolisisa ngokusetshenziswa kwemali ezithe kumele kulungisiswe.
”Engingakutsho yikuthi laba abakhangela amabhuku ethu, ama auditors, basithembise ukuba umsebenzi abasele lawo ungabathatha amaviki amathathu kusiya kwamane, ukuthi bawugoqe. Ngemva kwalokho kulapho esizabiza khona umhlangano ukuze bazotshela abanikazi beqembu ukuba baphume lani njalo amabhuku ethu ami njani, imali zethu zimi njani.
“Okwenze kuphuze kangaka asikakutholi kangako kodwa abasitshele khona yikuthi bebekhangelele ukuthi aluba singatshengisela imali esiyisebenzisayo ngemali zonke ezisetshenziswa kweleZimbabwe njengoba khathesi kweleZimbabwe kusetshenziswa imali ezitshiyeneyo. Ngokusemthethweni kusetshenziswa imali yakuleli eyeRTGs yikho ngalokho bathe sebesebenzile bakunanzelela ukuba kulezinye futhi imali ebezisetshenziswa yikho mhlawumbe yikho lokho asebekulungisisa.”
UBekezela Ngoma, ilunga leqembu leHighlanders okuthiwa yilife member ngeSilungu, uthi isizatho abasiphiweyo basizwile kodwa sekuleminyaka eminengi kusetshenziswa imali zakwamanye amazwe kwele Zimbabwe.
“Ngokutsho kwabo akulanto enxele kodwa ingcazelo yakhona ayilamkantsho ngoba phela ukusebenzisa imali zakwamanye amazwe kuqale kudala ngo2009. Ngalokho ke besikhangelele ingcazelo engcono ikakhulu ebantwini abaphatha imali ukuze sibe kwazi ukuthi okubangele khonokho kuyini.”
Intathelizindaba yezemidlalo, uMuziwethu Hadebe, uthi akusikho kwakuqala ukuba iqembu leHighlanders lingenelisi ukuphakulela amalunga alo isimo sesikhwama salo kodwa indlela inkokheli eyenze ngayo namhla yiyo eyenze abantu bacabangele ukuba kukhona okutshaya amanzi.
“Iphutha lisuke laba khona ekutheni umhlangano uthe uqalisa kwahle kwakhulunywa ukuba akusoze amalunga atshelwe ngesimo sezimali. Bekumele belandele uhlelo lwabo lweAGM, abesebuya yena umphathingcebo achasise ukuba imali zakhe zimi njani njalo akasoze abaphakele ngesizatho esithile. Kubesekusithi amalunga abasekhuluma ngalokho.
“Inkinga enkulu ihle yaba sekuqaleni lapho abazame ukuthi owayengumgcinisihlalo kodwa oselilunga leboard uPeter Dube ahle azame ukuxolisa ukuba akusoze kwethulwe ukuba imali isebenze njani. Yikho lapho okuhle kwaba lephutha khona.”
Udaba lokungaziswa kwamalunga ngezimali kuhle kwadala ukuba kube lokufuthelana amalunga esesithi asikho isizatho sokuba uqhubekele phambili umhlangano kodwa bakhona ababhule umlilo.
Ezinye indaba ezivuse ulaka lwabalandeli ngezigoqela udaba lukamqeqetshi, uJoel Luphahla, yena ongela amaphepha amvumela ukuba aqeqetshe kusigaba sePremier Soccer League kanye lokuthengwa kwabadlali abavela kwamanye amadolobho kulahliswa abantwana bakoBulawayo.
Facebook Forum