UMongameli Alexander Lukashenko wakwele Belarus, ofike eZimbabwe ngoMvulo, ukhangelelwe ukuba uzalobelana izivumelwano ezimbalwa loMongameli Emmerson Mnangagwa.
Ukuza kuka Lukashenko kuleli kuza ngemva kokuba isikhulumeli selizwe leli, uMnu. Livit Mugejo, ethe uhambo lolu lukakho ukuqinisa ubudlelwano kwezomnotho lezombusazwe phakathi kwamazwe womabili.
EleBelarus lilobudlelwano obuqinileyo lele Russia njalo liphansi kwezijeziso zomnotho zamazwe engentshonalanga njengele Zimbabwe.
Eloba ekhasini lakhe enkundleni yokuxhumana eyeTwitter unobhala kugatsha lokwethulwa kwemibiko uMnu. Nick Mangwana uthe lolu luhambo lwakuqala olwenziwa nguLukashenko kuzwekazi leAfrica lokhe wathatha intambo zombuso ngomnyaka ka1994.
Ukuza kuka Lukashenko njalo kuyindlela yokutshengisa ubungani be Zimbabwe lamazwe asekela ele Russia ngesikhathi sempi ekhona phakathi kwe Ukraine le Russia.
Ingcitshi kwezombusazwe, uMnu. Bekezela Gumbo, uthi uhambo lolu luqakathekile kakhulu ngoba lutshengisa ukuba uhulumende weZimbabwe usedinga abnye abangane.
“Kutshengisa ukuthi ZANU PF ka Mnangagwa isikunanzelele okwakubonwa ngu Mugabe ukuba kumele bekhangele emazweni awempumalanga. Sebefuna ukuba wonke
Uqhubeke esithi uhambo lulo lungaba yindlela yokuba ele Zimbabwe lidinge imali yokuziphilisa.
“Uhulumende weZimbabwe usebona ukuba kumele adinge imali esebenzisa ele Belarus ukudinga indlela zokuziphilisa”
Ingcwethi kwezomnotho, uMnu. Prosper Chitambara, uthi, “Uhambo lolu luhle kakhulu ikakhulu ekuthengiselaneni phakathi kwele Zimbabwe leBelarus. Kukhona ubedlelwano bokuthengiselana obungaba khona phakathi kwemazwe lawa.”
Ubudlelwano phakathi kwamazwe lawa baqiniswa ngomnyaka ka2015 ngesikhathi uMongameli Mnangagwa esesengu msekeli kaMongameli Robert Mugabe.
Ngomnyaka ka 2019 uMongameli Mnangagwa wavakatshela kwele Belarus, lapho amazwe womabili alobelana izivumelwano uLukashenko wathembisa ukuvakatshela eHarare. Kusukela ngalowo mnyaka amazwe lawa abe lokhu eqinisa lobu budlelwano ikakhulu kwezomnotho.
Abanye bayasola ubudlelwano phakathi kwamazwe lawa ngemva kokuba uhulumende ethe ufuna ukuthenga imitshina yokucitsha umlilo kwele Belarus okuyibhizimusi abanye abathi kayikho emthethweni.
Abanye njalo basola ubudlelwano phakathi kuka hulumende kaMnangagwa lamankampani awe Belarus besithi amankampani la alobungane loMnangagwa kungakho evunyelwa ukuthenga amatshe aligugu awama diamonds.
Facebook Forum