Abekomishini ebona ngokuqhutshwa kokhetho eye-Zimbabwe Electoral Commission - ZEC, bethulele umongameli Emmerson Mnangagwa ugwalo olulungisisiweyo olwe- Delimitation Report ngolweSihlanu, lapho abathi bengeze imibono abayithole edale lePhalamende kanye lekamongameli.
Umgcinisihlalo we-ZEC u-Justice Priscilla Chigumba uthi bachasisile ukuba yiphi inguquko abayenzileyo, lokuba yikuphi abangakusebenzisa, kanye lezizatho zokwenza lokho.
Abe-ZEC bathi balethemba lokuba ugwalo oluveza imingcele abalunikeze uMongameli Mnangagwa, kuyilo oluzasetshenziswa kukhetho lwalonyaka, besithi benze umsebenzi wabo ngobuciko obukhulu belandela okutshiwo yisisekelo sombuso. Bathi lolugwalo luzokwenza kube lokuguqulwa kweminye imingcele nxa kuqathaniswa lalolo ababelethule ekuqaleni.
Umgcinisihlalo we-ZEC, uJustice Priscilla Chigumba, uthe, “Thina njengabe-ZEC, silomlandu wokuqhuba inketho zonke elizweni. Ngithanda ukwazisa uzulu ukuthi lokho asikwenzi ngoba sifuna ukujabulisa uzibani, loba iqembu elithize.” Kutsho u-Justice Chigumba
Umsekeli kamgcinisihlalo weZEC, uCommissioner Rodney Simukai Kiwa, laye uthe, “Izikhalazo esazithola zivela ePhalamende lezaphuma ku-President, sazikhangela silandela umthetho. So namuhla size lapha sizomnika, ukuthi thina yikho lokho esikubonileyo; yikho lokho esikucabangayo, silandela umthetho wethu we-Zimbabwe.”
UKiwa uthe balethemba lokuba umongameli uzalwemukela lolugwalo.
“Ukuxabana singaxabana; asibonisane ukuthi singaya phambili njan., Ngingakhuluma ukuthi khona thina abantu be-Zimbabwe sibanye nxa sesikhuluma ngendaba yokuthi kumele kube lokuthula lapha e-Zimbabwe.”
UMnu. Bekezela Gumbo ingcwethi ecubungula ezombusazwe, uthi luqakathekile kakhulu lolugwalo kwezokuqhutshwa kokhetho, ngakho bekumele lwenziwe ngonanzelelo; hatshi ukulujaha.
“Indaba le eye-delimitation, ma thina ku-political science ma sikhangela indaba zokuvota lokhu lokungena embusweni, sikhangela kakhulu ukuthi ngubani olamandla wokutsho ukuthi ngubani ovotayo ngubani ongavotiyo. Yena lowo ke nguye umuntu olamandla wokuwina.”
Kwagcizelelwa yisikhulumeli senhlanganiso ebona ngezokusabalaliswa kwemibiko phezu kwemisebenzi yedale lePhalamende kuzulu eye-Veritas Zimbabwe, uMnu. Valentine Maponga.
“Thina njenge-VERITAS, sibona ingani sebexotshana lesikhathi ekwenzeni umsebenzi wabo.”
Abe-ZEC bethulela umongameli Emmerson Mnangagwa i-Preliminary Delimitation Report mhlaka-26 Mpalakazi, njengalokho okutshiwo yisisekelo sombuso, ukuthi nguye omele ayithole kuqala andubana iye edale lephalamende ukuyahlaziwa. Mhlaka 6 Zibandlela, kulapho olwethulelwe edale lephalamende, lona elibumbe ikomithi yamalunga alitshumi lantathu i- "13 member ad hoc committee" eyakhitshwa kumabandla amathathu, kanye loyedwa ozimelayo. Leyo khomithi yayikhokhelwa nguMnu. Pupurai Togarepi, uChief Whip webandla leZanu PF. Umsebenzi ungowokukhangelisisa leyo Preliminary Delimitatiom Report, eyethulelwa ingatsha zombili ezibumba idale.
Lekhomithi yasisiyakwethula eyayo i-report edale lephamende mhla ka 13 Zibandlela, idale laselikhuluma ngayo mhla ka 17 lo 18 kuZibandlela.