Ilunga ledale lephalamende, elimela i-Binga, uMnu. Prince Dubeko Sibanda awebandla le-Citizens Coalition for Change, uthi bavumelana lohulumende ukuthi umthetho osalolongwa oqondisa ukhetho owe-Electoral Amendment Bill kumele ulungisiswe, kuguqulwe ezinye iziqa ukwedlula lokho okukhona manje.
Lokhu kuphume emhlanganweni owenziwe ngabe-CCC lentathelizindaba e-Media Centre lamuhla, wokuveza ukuba njengebandla bami ngaphi ngalumthetho osalolongwa owe-Electoral Amendment Bill.
Ekhuluma kulumhlangano, omela iBinga edale lephalamende, engowebandla leCCC, uMnu.Prince Dubeko Sibanda uthi bafisa ukuba kuguqulwe okuthile kule i-Bill.
“Sifuna i-Voters Roll ibe yi-Voters Roll yokuthi oyifunayo ekwanise ukuyithola. Sifuna i-Voters Roll ibe yi-Voters Roll ibe yi-Voter Roll yokuthi umuntu uyakwanisa ukuthi acubungule okuthiwa yiku-analyzer. I-Voters Roll siyabe sifuna ukuthi singakayi kuma-elections, i-Voters Roll kukwaniseke ukuthi khona kube le-audit firm, ama-audit firms angayi-auditer ukuthi kubonakale ukuthi akula zipoko phakhathina kwe-Voters Roll yona leyo. Singasuka khonapho ke sikhangelele njalo ukuthi ama-ballot papers; kufuze ukuthi kube lesivumelwano ukuthi ngubani ozadinda ama-ballot papers. Nxa angadindwa, adindwa njani, ngubani oba phezulu, ngubani oba phansi. Njalo nxa esesiyagcinwa esehamba esiya lapho ahamba khona, umuntu kabekwazi ukuthi ahamba njani.”
USibanda ulandisa ngokunye abafisa kungene kuleli-Bill okugoqela ukuvunyelwa ukuvota kwabahlala kwamanye amazwe kanye labase majele.
“Yibo engibatshiloyo, ukuthi bavunyezwe ukuthi bevotele umongameli noma bengasoze bevotele ukhansela, noma bengasoze bevotele u-Member of Parliament. Njalo sikhangelele ukuthi abasakhulayo abanengi, i-ZEC, kayanelisanga ukubafinyelela lapho abahlezi khona. Ibisithi kabahambe begade beyebhalisa ukuvota kweyinye indawo. Thina sithi abantu laba kabalayo leyo mali eyokuthi benze njalo. Kungakafiki i-election, kakuvunyelanwe ukuthi kube le-Voter Registration Blitz eyakwenza ukuthi khona i-ZEC ihambe ebantwini iyebabhalisa ukuvota. Kanti besekusiba lezibotshwa ezokuthi zibe lesikhathi eside ziphakathina ejele, kumbe zizapika isikhathi eside. Abantu abanjalo kufuze ukuthi bancediswe ukuthi labo bathole ithuba elokuthi bavotele abakhokheli babo.”
UMnu. Munashe Mtutsa isiphathamandla seZanu Pf, uthi baleqiniso lokuba uzolungisiswa ngendlela lumthetho.
“Ma sisiya kukhetho luka 2023, asenzeni konke ngokuthula, ngothando njengabantwana abe-Zimbabwe. Abantu kabayenze izinto ngendlela etshengisa ukuthula; ngendlela etshengisa ukuthi hayi, ilizwe lethu leli aliye phambili. Sitshiye ize, sitshiye laba abasenga lezimithiyo, sitshiye labo abathanda ukuqamba amanga, njalo abathi bona akula sitshwala esizadliwa e-Zimbabwe ngoba bazafaka itshebetshebe.”
Ingcwethi ecubungula ezombusazwe uMnu. Tjenesani Ntungakwa, uthi amabandla aphikisayo awezombusazwe ahlala ekhala ngenguquko le.
“Udaba lolu lunzima ngenxa yokuthi ayisonto ezintsha lezi ezikhulunywayo, udaba lwe-Voters Roll. Into mina kuphela engizwisa ubuhlungu njengesizalwane se-Zimbabwe, yikuthi akusela sikhathi singakayi kuvota. Lapho ngingakwazi ukuthi kuyayenziwa njani. Kodwa ngibona mina i-Zanu isebenzisa esingathi yi-system kumbeni esingathi yi-Public Service System, o-ZEC bonaba, o-Ministry of Home Affairs; amahofisi alelungelo lukulungisa lokho.”
Abe-CC bathi balethemba lokuba kuzokwamukeleka lokho abafisa ukuthi kuguqulwe kuleli-Bill ukwenzela ukuthi kube ngumthetho owenza abaqhuba ukhetho baluqhube ngendlela ukuze lempumela yalo yamukeleke.
