amalinks wokungena

Breaking News

USithethelelwe 'Kwinji' Sibanda Useqeqetsha Abaqeqetshi Bamaqembu ePremier League


Sithethelelwe 'Kwinji 15' Sibanda
Sithethelelwe 'Kwinji 15' Sibanda

BULAWAYO - USithethelelwe 'Kwinji' Sibanda, umqeqetshi weqembu labesifazane elimela ilizwe eleMighty Warriors, usengumqeqetshi wabaqeqetshi bomdlalo wenguqu.

USithethelelwe nguye owesifazane owakuqala ukuqeqetsha kusigaba sePremier Soccer League ngesikhathi eqhatshwe ukuba ngumsekeli kaLizwe Sweswe kuqembu leTsholotsho.

Usekwenzile njalo njengoba esebe nguye owesifazane owakuqala ukuba ngumqeqetshi wabaqeqetshi bomdlalo wenguqu eZimbabwe. Kulez’insuku uphakathi kokufundisa abaqalayo ukwenza izifundo zokuqeqetsha ehlelweni oluqhutshelwa esikolo seMilton High edolobheni lakoBulawayo.

“Lezi yizifundo zabaqalisayo ukufundela ukuqeqetsha njalo sileqembu lezifundi eziphangisa ukubamba. Bayafunda eklasini baphinde bafunde enkundleni besebephiwa imihloliso. Silezifundi ezitshiyeneyo njengoba kukhona ababengabadlali bomdlalo wenguqu, iziphathamandla zamaqembu kanye lababalisi.”

Ngaphandle kokuba ngumqeqetshi wabaqeqetshi, uSibanda uvele ungumqeqetshi osebenza lamaqembu abalisa elabesifazane elimela ilizwe eleMighty Warriors.

“Nyakenye bengisebenza leqembu elidlala kusigaba sikaDivision One eleTalen Vision lapho ebengisebenza khona loLizwe Sweswe. Ngenxa yesimo somnotho ngitholakala esikhathini esinengi ngisebenza lamaqembu abesilisa kodwa isifiso sami ngesokuthi ngisebenze leqembu labesifazane ukuze ngidlale eyami indima ekuthuthukiseni umdlalo wenguqu yabesifazane.”

Phakathi kwabaqeqetshi abangamatshumi amabili lambili abaphatheke kuzifundo lezi eziqhutshelwa esikolo seMilton High, kulabesifazane ababili kuphela. USithethelelwe uthi balokhu besanda kancane kancane abesifazane abaphatheka kunhlelo zokuqeqetsha umdlalo wenguqu njalo ukhuthaze labo abake badlala ukuba labo bafundele ukuqeqetsha.

“Ngibatshayela ihlombe omama laba ngokuba yingxenye yezifundo lezi. Yebo kambe sebesiba khona abomama, ngoba mina ngesikhathi ngiqala ngangisiba ngedwa owesifazane, kodwa ngicabanga ukuba inani lingakhula nxa labo abake badlala kumbe asebezathatha umhlala phansi labo bengafundela ukuqeqetsha.”

USithethelelwe udume kakhulu edlalela iqembu labesifazane elimela ilizwe emdlalweni wenguqu lapho ayedlala khona labanye abagoqela uNomsa Boyz Moyo, uRosemary Mugadza, uPrecious Mpala kanye labanye.

Ungomunye wabaqeqetshi abalesithupha seCAF A, esidingakala ukuze umuntu aqeqetshe kusigaba sePremier Soccer League.

Phezu kwalokho uke wenza izifundo zokuqeqetsha elizweni leGermany ikanti khathesi uphakathi kwezifundo zokuba abe ngomunye wabaqeqetshi abafundisa abaqeqetshi emazweni akuzwekazi laseAfrica.

XS
SM
MD
LG