BULAWAYO - Inhlanganiso ebona ngokuhlela kuhle imuli, eyeZimbabwe National Family Planning Council, ibika ukuba ilohlelo lokupha uzulu usizo lomsebenzi wabo kungela mbadalo, iFree Reproductive Health Service, ngosuku lwezithandani, iValentine's Day, njengendlela yokubonga uzulu ngokubambisana labo.
Loluhlelo lugoqela imfundiso yokusetshenziswa ngendlela engaisiyo imithi lezidakamizwa lokuqakatheka kokuhlukunyezwa emacansini, iReproductive Health abuse, kubontanga abaleminyaka ephansi kwamatshumi amabili lane-24.
Lokhu kuza ngesikhathi lapho kulokukhuphuka kokusetshenziswa kwezidakamizwa ngontanga okungezelela udubo lwabaqala ezemacansini besesebancane.
Inhlelo zeZimbabwe National Family Planning Council eziphathelane le Reproductive Health zizabe zitholakala kungela mbadalo endaweni ezibaisa i-Lister Clinic ephakathi kwemigwaqo u8th kanye lo9th Ave lomgwaqo uSamuel Parirenyatwa kanye lesibhedlela se Mpilo.
UMnu. Mission Gwafa, isikhulumeli senhlanganiso yeZimbabwe National Family Planning Council, uthi kunengi okuyabe kusenziwa ngoLwesibili kunanzwa usuku lokuthandana olweValentines’ Day.
“UFebruary waziwa njengenyanga eyothando kubekanti u14 February yiValentines Day njengenhlanganiso sililethela amaServices ethu wonke for free kuyindlela esifuna ukulibonga ngayo sibonge izithandani lama cliets ethu wozanini ngobunengi benu. Wonke amaservices eFamily Planning ukwelatshwa imikhuhlane yemacansini lokuhlolwa imvukuzane imikhuhlane etshiyeneyo yereproductive health sikwenza khonalapha mahala iclinic yethu ukuSamuel Pararenyatwa leMpilo.”
UMnu. Mission Gwafa uqhubeka echasisa kabanzi ngezinye zenhlelo abazazenza ezigoqela umkhankaso wemfundiso ngengozi yokusetshenziswa kwezidakamizwa.
"Okunye esikwenzayo kusasa yikukhankasa ngokusetshenziswa kwezidakamizwa silohlupho olukhulu kwabasakhulayo bethu. NgeValentines day bazakholisa banathe babheme izidakamizwa zonke bacine besenza ucansi olungavikelekanga wozanini sizofundisana ngokuthisenze njani sizivikele.”
UNkosikazi Nomagugu Maphosa, isakhamuzi sakoBulawayo, uthi udubo lokusetshenziswa lokunathwa kotshwala okwedlulisa amalawulo ebantwini lokhu kuqhela ngakhoke kuqakathekile ukuthi bafundiswe ngengozi yalokhu.
“Suyawamukela umkhankaso wakusasa ukuthi sithole uncedo kungela mbhadalo kodwa esikuthabele kakhulu yimfundiso ezaphiwa abantu mayelana lezidakamizwa okuyinto enhle kakhulu esikufisa kakhulu yikuthi umkhankaso lo ubekhona lezikolo sikhathi sonke ukuze bakwazi ingozi yokusebenzisa izidakamizwa.”
UMnu. Njabulo Sebele umongi ukhuthaza obesilisa ukuba baphatheke kuzifundo zemacansini.
"Kuyisikhathi sezithandani kanje kuqakathekile ukuthi umuntu ahambe lomunye wakhe, ikakhulu obaba labo bephatheke endabeni zeReproductive health ngoba kuyaphathisa kakhulu ukuthi bezwisise ukuthi umuntu ongumama uvele uhlangana lani ngezikhathi lezi. Ngendaba yezidakamizwa kufanele abantu benanzelele njalo bephathe ndawonye bebone ukuthi ikusasa yelizwe yiyo engani isixega ngenxa yokuthi bona ontanga bengavele bezijayele izidakamizwa besakhula kuzakuba yimpilo yabo njalo kaquma impilo yabo."
Ukusetshenziswa kwezidakamezwa ngabasakhulayo kuluhlupho oseluvele obala njalo kulabontanga abanengi elizweni abatholakala bezisebenzisa ezemihlobo eyehlukeneyo.
Inhlanganiso yababalisi bemaphandleni eyeAmalgamated Rural Teachers Union of Zimbabwe yethule umbiko othi kusukela ngomnyaka ka 2000, izikolo zavele zahlaselwa ludubo lwezidakamizwa kodwa abazithengisayo bengabotshwa lanxa kungabantu abaziwayo emphakathini. Lokhu kuza ngemva kokutholakala kwabafundi abangamantombazana basesikolweni eseDominican Convent, esiseHarare besebenzisa lezizidakamizwa.
Inhlanganiso yeARTUZ iqhubeke isithi abayibo abathengisa lezi zidakamizwa babonakala bezula ezitaladeni kungela kujeziswa lanxa besaziwa. Abantwana abavela emalokitshini kumbe ezindaweni ezisathuthuka basebunzimeni ngoba bengenelisi ukuthola inhlelo zokubancedisa ukutshiya izidakamizwa lezi.
Uhulumende ukhuthazwe ukuthi asungule indawo zokwelaphela abantu abasebenzisa izidakamizwa, abophe labo abaziwayo bezithengisa izidakamizwa, abazali labo bangenele ngokuqamba abantu abathengisa izidakamizwa njalo lamapholisa atholakala eyingxenye yokuthi izidakamizwa zimemetheke abotshwe.