WASHINGTON DC - Indodana kamuyi uRobert Mugabe, owayengumongameli wakwele Zimbabwe, imiswe emthethwandaba namuhla isetheswa icala lokubhidliza impahla zomngane wakhe eHarare.
Amapholisa abika ukuba uRobert Tinotenda Mugabe Junior umangalelwe nguNkatazo Sindiso othi uchithize impahla elesisindo esifika inkulungwane ezilitshumi lambili zamadola eMelika – US$12,000.
Athi wenze lokhu eStrathaven eHarare. Kawazange achasise ukuba kwenzakale njani. Kubikwa ukuba eyinye impahla ayibhidlize ngesikhathi esedilini lomngane wakhe ligoqela imota ezimbalwa.
Abezindaba abeZimLive bethulele uzulu iVideo etshengisa uRobert Mugabe Junior esiya emthethwandaba.
UMnu. Ashiel Mugiya, igqwetha lakhe, uthe umantshi ucele ukuba amapholisa akhulumisane laye engakamthonisi emthethwandaba.
Kasenelisanga ukukhuluma legqwetha lakhe. Ukuze sihlaziye udaba lolu, sixoxe loMnu. Effie Dlela Ncube, olwela ilungelo loluntu, othi ulakho ukungathoniswa ngemfanelo okaMugabe ngoba ulobudlelwano lebandla elibusayo.
Kodwa uMnu. Believe Gaule, ilunga lebandla leZanu PF, uthi uzathoniswa njengomuntu wonke wakwele Zimbabwe.
Facebook Forum