WASHINGTON DC - Umkhokheli weMDC-T uMnu Douglas Mwonzora ubotshiwe namuhla wamiswa phambi komthethwandaba esetheswa icala lokwethusela ukudubula owesilisa owake wasebenzela ibandla lakhe.
Kodwa uMwonzora utshele iStudio 7 ukuthi inkantolo ihle yalahla lelicala ngoba ingatholanga ubufakazi. Uthi umamangala uyamsukela nje ngoba akalawo lombobho athi wamethusela ngawo.
Ukubotshwa kukaMnu Mwonzora kuza ngesikhathi kulokulwisana okukhulu kubandla lakhe abanye bemethesa icala lokweba imali yebandla, okulicala njalo alilandulayo.
Sikhuluma laye uMnu Mwonzora ubesegcekeni lendizamtshina eHarare elubhekise eBrussels kweleBelgium emhlanganweni weACP-EU Joint Parliamentary Summit.
