HARARE - Abebandla eliphikisayo leCitizens Coalition for Change babike ngokuphatheka kukhetho lwalonyaka njengoba ugwalo olwehlukanisa imingcele olweFinal Delimitation Report selwethulwe okusemthethweni lanxa belokukhonona ngalo.
Lokhu kuvezwe yisikhulumeli seCCC, uNkosazana Fadzai Mahere emhlanganweni lentathelizindaba owenzelwe eMedia Centre eHarare ngolweSithathu.
UNkosazana Mahere uthi akusela ngenye indlela ngaphandle kokuyamukela i-Report le, lanxa bekhonona ukuthi kayilayo inguquko akade beyikhangelele.
“Ukudindwa kwale-report mhlaka 20 February, kutsho ukuthi sesisalelwe zinyanga eziyisithupha ukuya kukhetho, ngokusemthethweni. Ingcwethi zethu zezomthetho sezisazise ukuba sikhangelele ukuthi ukhetho lungaba khona kumalanga aphakathi kwamhlaka 20 lo 26 Ncwabakazi.”
Abe-CCC bathi abazamela ibandla bazokhethwa ngendlela eyahlukile kulaleyo elandelwa ngamabandla amanengi eyokuqala kuyiwe kukhetho lwama primaries.
Isiphathamandla sohlangothi olubona ngezokhetho ku-CCC uCouncillor Ian Makone ulandisa kabanzi ngalokho.
“Kasifuni kwenza ingani siyayijabulela le-final report. Kumele sazi njalo ukuba li-report ye-ZEC yiyo esilungisiwe, njalo siwulandelayo umthetho thina.”
Ingcwethi ecubungula ezombusazwe, owenhlanganiso yeZimbabwe Democracy Institute umnumzana Bekezela Gumbo upha umbono wakhe ngendlela efuna ukulandelwa ngabeCCC.
“Nxa bezakulandela, ngoba indlela abafuna ukubuya ngayo yiyo vele eyeAfrica sibili. Yiyo esingayibiza kuthiwa yi-African Democracy ukuthi asimphongubuya umuntu, eyehlise ingani uvela ezulwini ezoqala sekuthiwa lo ngumkhokheli wethu, selenza ama-Primary Elections liphiwe amabizo elingazi ukuthi avela ngaphi. Khathesi ngikhuluma kunje thina eTsholotsho sileyinye indoda layo esingayaziyo ukuthi ngeyangaphi enguMP wethu, eyamphongubuya ivela kumbe ivela ngaphi emayadini, yabuya yazokuba nguMP weTsholotsho. Yindlela enhle kakhulu mina ngokubona kwami ma ngikukhangela ngendaba ye-representation, ukuthi sifuna umuntu omela abantu ebekwazi ukuhlupheka kwabo lokujabula kwabo, ebekwazi into abazifunayo.”
UMongameli Emmerson Mnangagwa usekhangelelwe ukwethula usuku okumele lwenziwe ukhetho ngemva kokwethulwa kwe-Final Delimitation Report ehlukanisa imingcele yokuvotela, osoludindwe kugwalondaba lukahulumende olwe-Government Gazette.