WASHINGTON DC - UNkosikazi Jill Biden, owethekelela kuzwekazi leAfrica, uthi kumele kuthuthukiswe abesifazana labatsha ukuze umhlaba wonke jikelele uphumelele.
Wethule amazwi la ngoLwesine kwele Namibia lapho amukelwe khona ngenjabulo izolo nguMongameli Hage Geinbob lomkakhe, uNkosikazi Monica Geingob.
Ekhuluma esigodlweni sika mongameli lapho obekuledili lokumamukela okusemthethweni, uNkosikazi Biden uthe umhlaba wonke jikelele ungeke wathuthuka uma kungaqakathekiswanga abesifazana labatsha, abagoqela amantombazana.
Engakethuli amazwi la, wethekelele indawo lapho okuqhutshwa khona inhlelo ezimbalwa ezisekelwa ngele Melika ezilakho ukuthuthukisa abesifazana lamantombazana.
Abezindaba abeReuters babika ukuba uNkosikazi Biden wakhetha ukufikela kwele Namibia, kuhambo lwakhe lwakuqala kuzwekazi leAfrica, esithi ilizwe leli lenza kahle ekubuseni uzulu. Uthe eleMelika lisekela umbuso okhululekileyo njengalokhu okwenzakala kwele Namibia. UNkosikazi Biden ngowukuqala phakathi kwabo bonke abaseduzane loMongameli Biden ukuba ethekelele kuzwekazi leAfrica kulandela okwethulwa nguBiden nyakenye emhlanganweni owe-U.S Africa Leaders Summit eWashington DC lapho aveza khona ukuba uzakwethekelela kuzwekazi leAfrica lonyaka.
UNkosikazi Biden ukhangelelwe njalo ukuba uzakwethekelela kwele Kenya esuka eNamibia. Olandela ezombusazwe, uMnu. Den Moyo, utsheleiStudio 7 ukuba kuqakathekile okwenziwa nguNkosikazi Biden.