HARARE - Umkhokheli webandla lezombusazwe elisungulwe nyakenye, eleDemocratic Union of Zimbabwe (DUZ), uMnu. Robert Chapman, uthi ibandla lakhe yilo lodwa elingahlenga eleZimbabwe ebunzimeni eliphakathi kwabo.
Ekhuluma emhlanganweni wokukhankasela ukhetho awenzele enkundleni yeShowgrounds eHarare ngoMgqibelo, uMnu. Chapman uthe ilizwe lidinga ibandla elithembekileyo njalo elisebenzela uzulu ukuze lithuthuke.
Ekhuluma kulumbuthano ongenwe ngamakhulu amahlanu abantu, 500, uChapman uthe usehambe endaweni zonke zeZimbabwe lapho abone khona abantu bebhekane lobunzima obumangalisayo, bona athi bungaqedwa kuphela nguhulumende webandla lakhe, alubana lithe lavotelwa langena embusweni kukhetho oluzayo.
UChapman uthe engangena embusweni, uzakhwezela izisebenzi iholo njalo zithole imali ethize, i-iminimum wage ngesilungu, ukuze ziphile ngcono lemindeni yazo.
Uthembise njalo ukuvuselela umnotho lokuthatha amanyathelo azaqinisa idola leZimbabwe libe lohlonzi, njalo ilizwe lenelise ukuthengisa impahla phandle kwelizwe.
Omunye wabasekeli balelibandla obesemhlanganweni lo, uMnu. Peter Tshuma, uthi u-Chapman ezimisele ukuvuselela umnotho weZimbabwe engangena embusweni kukhetho oluzakwenziwa kunyanga ezimbalwa ezilandelayo.
Ohlaziya ezombusazwe uMnu. Hebert Dube, uthi kunengi okumele kwenziwe nguChapman ukuze uzulu amethembe phambilini kokhetho.
UMnu. Chapman ukhulume njalo ngodubo lokusetshenziswa kwezidakamizwa osolubhahile eZimbabwe esithi lubangelwa yikusilela kwemisebenzi.
Ngokunjalo, uthe uhulumende wakhe uzaqeda loludubo ngokusungula imisebenzi ukuze absakhulayo, okuyibo abasebenzisa kakhulu okudakayo, bathole okokwenza.
Kukhetho oluzayo, uChapman uzancintisa edinga ukuba nguMongameli weZimbabwe njalo ukhangelelwe ukungqikilana labakhokheli bamabandla atshiyeneyo abagoqela uMongameli Emmerson Mnangagwa oweZanu PF kanye loMnu Nelson Chamisa, owebandla elikhulu eliphikisayo eleCCC.
