amalinks wokungena

Breaking News

Sezibakhalele Abafana beMathula High School eTsholotsho Abaphume kuVideo Bebhaxabula Umfundi Oyintombazana


Handcuffs hanging on dark
Handcuffs hanging on dark

WASHINGTON DC - Amapholisa athi abophe abafana abathathu abafunda eMathula High School, eTsholotsho, ngemva kokubonakala ku-video bebhaxabula kabuhlungu omunye umfundi oyintombazana ngemswazi lengodo.

Omunye wabafundi laba ubonakala ethwele ibhemba. Isikhulumeli samapholisa uMnu Paul Nyathi ufakazele inkundla yeCite ngokubotshwa kwabafundi laba njalo waxwayisa abantwana besikolo jikelele ukuthi betshiyane lokuhlukuluzana.

“Lelo cala selamukelwe ngamapholisa futhi simtholile umamangala labafakazi. Sesibophe abasolwa abathathu kuze kube manje,” kutsho uNyathi.

UNyathi uthe ababili babasolwa laba baleminyaka yokuzalwa elitshumi lasithupha, 16, kuthi oyedwa uleminyaka elitshumi lasikhombisa, 17.

Uzulu ubethukuthele kakhulu phezu kwe-video le esithi abafana laba yizidlova ezimele zibotshwe zijikelwe entilongweni njalo zixotshwe esikolo.

Isehlakalo lesi siza ngemva kokubulawa komunye umfundi weFounders High School koBulawayo ngenyanga ephelileyo, uWayne Ndlovu, yena owagwazwa ngengqamu ngumfundi weHalimton High School.

Inhlanganiso yababalisi bemaphandleni eyeAmalgamated Rural Teachers Union of Zimbabwe (ARTUZ) ithi uhulumende kumele esule umthetho owalisa ababalisi ukutshaya abafundi ngoba isithi lokho yikho osokwenza abantwana besikolo babe ngamahlongandlebe.

Umzali uMnu Effie Dlela Ncube utshele iStudio 7 ukuthi ngempela udaba lwamalungelo abantwana besikolo, okugoqela elokuthi abasatshaywa ngababalisi, ngokunye okubangela ukuthi abafundi bahlukuluzane njalo babe ngumhlambi kazelusile.

please wait

No media source currently available

0:00 0:01:25 0:00
XS
SM
MD
LG