Umthethwandaba weHigh Court unqume ukuba akudingeki ukuthi abekhomishini eqondisa ezokhetho eyeZimbabwe Electoral Commission, baveze ugwalo lwabalelungelo lokuvota olwemitshineni yakulezi insuku, i-electonic voter’s roll. Abe ZEC bathi kuyingozi kwezomvikela ukwenza lokho ngoba kulakho ukusetshenziswa ngendlela engayisiyo okungabangela ukungahlaliseki elizweni.
Ummeli weHarare North edale lephalamende uMnu. Rusty Markham, webandla eliphikisayo eleCCC, ukhweze isicelo emthethwandaba waphezulu oweHigh Court nyakenye efuna luvezwe njalo lufinyelelwe nguzulu wonke ugwalo lwabalelungelo lokuvota olwebulenjini olwe Electronic Voters Roll.
Elinye lamagqwetha kaMnu. Markham, uMnu. Denford Halimani ulandisa kabanzi ngokwenzakale emthethwendaba weHigh Court lamuhla ngaloludaba.
“Kungelani lempumela yaloludaba, sisayidinga leyo Voters Roll. Ngicabanga ukuthi abantu baseZimbabwe basayidinga i-Voters Roll njalo ngicabanga ukuthi umthethwandaba ukubonile ukuba kulensuku ezingu-145 kusukea esukwini olwacelwa ngalo i-Voters Roll le kodwa lokhe ingakavezwa. Siyayidinga ngoba sisiya kukhetho. Ngakho-ke ngicabanga ukuthi lolu ludaba olusakhona lapho esisadinga khona ukuthi abe-ZEC basitholise leyo Voters Roll.”
Umsekeli wohlangothi olubona ngezokhetho kuCCC uNkosikazi Ellen Shiriyedenga uthi kuyadanisa okwenzakale emthethwandaba lamuhla.
“Njengebandla leCCC sikhathazeke kakhulu ngesinqumo esikhitshwe yiHigh Court ukuthi ubaba Honourable Rusty Markhamlabantu jikelele akumelanga bephiwe iVoters Roll. Sibona lokhu kuyikuyephula umthetho wethu waseZimbabwe ngoba umthetho uyakufaka mgceke ukuthi iVoters Roll lugwalo lukazulu, umuntu lomuntu oyabe ebhadale indleko ezifunakalayo kumele aphiwe ugwalo lolu. Njalo iVoters Roll iyasincedisa thina njengamabandla, kumbe abantu jikelele ukuthi sihluzisise ukuthi ugwalo lonalolu olusetshenzisiweyo, lugwalo olutshengisa lokho okukhona ebantwini sikhangela ukuthi umuntu lomuntu kuVoters Roll ukhona endaweni sibili lapho okumele ebekhona.”
UMnu. Effie Dlela Ncube, oyingcwethi kwezenhlalakahle kazulu owenhlanganiso ebona ngezamalungelo abathengi eye National Consumer Rights Association – NACORA, upha umbono wakhe laye kuloludaba.
“I-Voters Roll iqakatheke kakhulu uma kusiza okhethweni ngokuba iyiyo indlela eqakathekileyo yokubona ukuthi kambe labo abazavota ngabantu ababhalise ngendlela efaneleyo, kakho omunye yini okuVoters Roll omgafanelanga abe khona. Ngakho ke labo abelusa ukuthi kube lokhetho olukhululekileyo bayayidinga leyonto, bayadinga ukubona ngendlela elula eyalezi insuku esebenzisa imitshina ukuthi babone ukuthi kakulamuntu okuVoters Roll ongafanelanga kantike njalo akekho okade ekuVoters Roll osekhitshiwe. Bangavinjelwa lokho abantu kakubi lula ukwelusa ukhetho kubonwe ukuthi lu-free and fair, ngaleyondlela ke kuzaba lula ukuthi laba abafuna ukudlelezela badlelezele.”
Imizamo yokuthola imbono yeZanu Pf ngalesi sinqumo somthethwandaba weHigh Court kusicelo sikaMarkham, yehlule. Kodwa abe ZEC bavika ngokuthi lungethulelwa umuntu wonke lolugwalo ebulenjini lulakho ukusetshenziswa ukuphambanisa ezomvikela welizwe.
