BULAWAYO - Owayengumdlali wenguqu uMkhokheli Dube uqhuba inhlelo zokuguqula impilo zabasakhulayo ngokubafundisa ibhola kanye lokubadingela amathuba wokuya funda eMelika.
UDube uqale iqembu leZebra Revolution ngo2015 njalo uthi okumenze waqala leliqembu yikuba wayesekubone kufanele ukuba kulendingeko eyokuba kuguqulwe indlela abasakhulayo bakulezinsuku abacabanga ngayo ngomdlalo wenguqu.
“Kulezinsuku ngisebenza labafana abancane. Ngizama ukuba ngiguqule impilo yabo, badlale ibhola bekwazi ukuba lumdlalo sekungumsebenzi khathesi. Akusafani lakudala okwakuthiwa abantu abadlala ibhola kabafundanga. Yikho sizama ukuba sibaguqule babe ngabadlali bezinga laphezulu.”
UDube uthi bathe beqala iqembu baqale ngabadlali abaleminyaka elitshumi lambili njalo inengi lalabo bafana balokhu belabo.
“Sithe siqala ngo2015 abafana bethu sabathembisa ukuba bengafikisa iminyaka elitshumi lesikhombisa sizabumba iqembu elidlala kusigaba sikaDivision 2 njalo lokho sikwenze nyakenye.
Iqembu leli sikhangelele ukuba lonyaka kube yilo elingena kusigaba seSouthern Region Division One.”
UDube udlalele iqembu leHighlanders phambilini kokuthola kwakhe ithuba lokuyafunda kweleMelika laoho athe eseqede izifundo zakhe wadlalela iqembu elincintisa kusigaba seMajor League Soccer eleNew England Revolution.
Uthi laye useqalile inhlelo ezokutholela abadlali amathuba awokufunda kweleMelika.
“Sipha ithuba kubo bonke abafana abaleminyaka engamatshumi amabili kusiya phansi njalo lonyaka kuzakuba labafana abahlanu abazakuya funda eMelika abaphuma kuwo wonke amagumbi elizwe leZimbabwe. Into eqakathekileyo sikhangelele ukuba umdlali abekwazi ukudlala ibhola aphinde abekwazi esikolo ngoba lokho yikho okuzamenza abelethuba elihle elokuya funda emazweni njengalokhu okwenzakala kimi.”
Abanye abadlali bakwele Zimbabwe abalodumo abahamba bayafunda kwele Melika ngababalisa uDoughty Sithole, uMethembe Ndlovu, uThulani Ncube, uJoseph Kabwe, uJoseph Ngwenya kanye lamajaha ayehluphe kakhulu edlalela amaqembu eHighlanders awabasakhulayo uWayne Albertyn kanye lo Thabani Moyo, uBigger.
Ekuphendukeni kwakhe kwele Melika uDube udlalele iqembu leAmaZulu elaseSouth Africa, eZimbabwe udlalele amaqembu abalisa eleChicken Inn, eleBulawayo City, eleFC Platinum kanye leleHighlanders.