WASHINGTON DC - Unobhala obona ngobudlelwano beMelika lamanye amazwe, uMnu Anthony Blinken, yena ophakathi kokwethekela kweleEthiopia, uhlangane lomkhokheli walelolizwe ngoLwesithathu, uMnu Abiy Ahmed, bakhulumisana ngendaba ezitshiyeneyo ezigoqela ukuqinisa ubudlelwano phakathi kwamazwe womabili.
Isikhulumeli sogatsha lweU.S. State department uNed Price wazise ukuthi ababili laba bakhulume njalo ngokuthi abadala amacala ngesikhathi sempi phakathi kukahulumende weEthiopia labeqembu leTigray kumele bajeziswe kulandelwa umthetho.
UBlinken wazise ukuthi eleMelika lizakupha eleEthiopia uncedo oluphuthumayo olugoqela ukudla olungela kuzigidi zamadola edlula amakhulu amathathu, US$331 million.
Uhambo lukaMnu Blinken luza ngesikhathi eleMelika liqinisa imizayo yalo yokwakha ubudlelwano lamazwe aseAfrica kulandela umhlangano oqhutshwe nguMongameli Joe Biden lenkokheli yaseAfrica eWashington DC nyakenye.
UBiden usethumele njalo iziphathamandla zikahulumende wakhe eAfrica ezigoqela umkakhe, uJill Biden, yena uBlinken kanye lomsekeli kaBiden, uNkosikazi Kamala Harris, ozakwethekelela kweleZambia, Tanzania leGhana kulinyanga.
Amazwe ancintisana leMelika afana leRussia leChina lawo enza okufanayo.
Ingcwethi kwezombusazwe uMnu Effie Dlela Ncube uthi uhambo lukaBlinken kweleEthiopia luqakathekile kakhulu ekuletheni ukuthula kulelolizwe ngemva kwmpi esanda kuphela ebulalise abantu abanengi.
