BULAWAYO - Iqembu leCaps United linqobe eleManica Diamonds nge 2 ka nya ngase National Sports Stadium, iqembu leTriangle United linqobe eleHerentals nge 1 ka nya emdlalweni obuse Gibbo Stadium.
Umdlalo oqhutshelwe enkundleni yeBarbourfields phakathi kweqembu leHighlanders leZPC Kariba uphele zingutshiki lobhanqa 0 ka 0.
Kusenjalo, uMtewa Masiku, owadlalela amaqembu enguqu abalisa eleRailstars, eleHighlanders kanye leleDynamos, uthi akusela ozakhulisa isibongo sangakibo edlala umdlalo wenguqu njengoba abasakhulayo abangakibo bengaselalo uthando lomdlalo wenguqu. Intathelizindaba yethu yezemidlalo uJoseph Njanji usipha loludaba ngokugcweleyo.
UMtewa labafowabo uMaster kanye loGideon badlale kusigaba saphezulu esePremier Soccer League eminyakeni eyedluleyo. Kodwa uMtewa uthi ithuba lokuba kube khona omunye owakoMasiku osengadlala kuPSL eminyakeni elandelayo lincane kakhulu.
“Abantwana sebahle bantshintsha. Akusela mntwana odlala ibhola ngekhaya, bonke sebahamba eGoli. Ngempilo esesiyiphila eZimbabwe bakubona ukuba okwebhola akuncedi kungcono bezihambele eGoli bayasebenza.”
UMtewa uthi yena uqale ukudlala ibhola elandela umfowabo uMaster, okunguye izibulo langakibo.
“Ngaqala ngilandela uMaster kodwa lami vele lami ngangilesifiso ngoba ibhola ngangilithanda. Ngaqala ngidlala emaYouth Centre ngemva kwalokho ngike ngadlala kumaqembu abasakhulayo aweqembu leHighlanders. Ngike ngadlala futhi kuDivision 2 ngingakayidlala kuRailstars. Ngo2000 yikho lapho engiqale ukudlala khona kuPSL ngiqeqetshwa nguEbson Sugar Muguyo owangithatha kuAli Baba Dube, okunguye owayesiqeqetsha kuqembu labasakhulayo.”
Amanye amaqembu adlalelwe nguMtewa kusigaba sePSL ngabalisa eleHighlanders, eleDynamos kanye leleBlack Mambas. Loba nje kungela owakoMasiku osengadlala kusigaba saphezulu eminyakeni elandelayo, sekungenzeka yena uMtewa atholakale eseqetsha njengoba eseqale ukusebenza labasakhulayo.
“Ngisasekhona ebholeni. Ngisebenza loMkhokheli Dube siqeqetsha abafana eSizinda Hall kuqembu leZebra Revolution. UMkhokheli nguye ongenze ngabakhona ebholeni kodwa mina vele ngilebhizimusi elokugezisa imota, yiyo indlela engiziphilisa ngayo.”
Iqembu leZebra Revolution lileqembu elincintisa kusigaba seBulawayo Province Division 2 kanye lamaqembu abasakhulayo adlala kusigaba seBulawayo Province Junior League.