Uzulu uthukuthele phezu kokutshaphazwa kwenotho yelizwe kanye lokutshontshwa kwegolide okwenziwa yiziphathamandla zikahulumende weZanu PF okuchaywe sobala izolo ngumsakazo kamabonakude, oweAl Jazeera, wona othethe iminyaka emibili uphenya udaba lwenkohlakalo ephathelane lokwebiwa kwegolide eZimbabwe.
IAl Jazeera yethule ihlandla lakuqala lefilimu yawo elamahlandla amane le eveza isikhonzi sikaMongameli Emmerson Mnangagwa kwamanye amazwe uMnu Eubert Angel etshela intathelizindaba zalumsakazo kulula ukungena elizweni lemali engcolileyo kumbe engatholakalanga ngendlela eqondileyo abesethenga ngayo igolide ukuze ibe yimali eyamukelekayo.
UNkosikazi Henrietta Rushwaya, yena oke wabotshwa ezama ukuphuma legolide elizweni laye uyathinteka kuloludaba.
Abanye abathintekayo kudaba lokutshaphazwa kwegolide leZimbabwe nguKamlesh Pattin owake wabotshelwa amacala afanayo kweleKenya, uEwan Macmillan, Simon Rudland labanye.
Asenelisanga ukukhuluma Labantu laba.
Kodwa uRushwaya yena uthe uzakhulume kunsuku ezizayo.
Ibhanga elikhulu lelizwe eleRBZ lithi seliphenya inotho kaAngela lakaMaMillan.
Sixoxe lesikhulumeli seCCC koBulawayo uMnu Swithern Chiroodza yena othi ifilimu yeAl Jazeera le iveza ukusela obuvele busazakala.
Sixoxe njalo lelunga leZanu PF uMnu Believe Gaule.