Sokuqhamuke ukufuthelana okukhulu kubandla le Zanu PF phezu kwempumela yokhetho lwama primary elections olokudinga abazamela lelibandla kukhetho lwezwelonke oluzakwenziwa ngontulikazi kumbe ngoncwabakazi.
Abasekeli be Zanu PF labo bathukuthele endaweni ezitshiyeneyo zelizwe besithi bavinjwe ukuvota kuma primaries aqhutshwe ngoMgqibelo langeSonto ngoba amagama abo ebengekho kungwalo zebandla.
Iphephandaba leNewsday libika ukuba iZanu PF isimise ukwethulwa kwempumela yokhetho lolu ngenxa yokukhonona osokukhona.
Ukhomisari walelibandla, uMnu. Mike Bimha izolo wazise ukuba akusavunyelwa ukuthi iziphathamandla zebandla zethule impumela engabusiswanga lidale elimqoka lebandla ele politburo.
Lokhu kwenzakala ngesikhathi unobhala wezokwethulwa kwemibiko, uMnu. Nick Mangwana ethule impumela etshengisa ukuba isiphathamandla sebandla, uMnu. Tafadzwa Mugwadi unqobile kodwa ngokuya kwesikhathi kwaphuma impumela ehlukeneyo etshingisa ukuthi umgwadi unqotshiwe.
Ukuhlaziya loludaba uNtungamili Nkomo uxoxe lolwela amalungelo oluntu uMnu Mbuso Fuzwayo, ongumkhokheli wenhlanganiso yeIbhetshu Likazulu.
