amalinks wokungena

Breaking News

Igqwetha Lika Eubert Angel Lithi Ngamanga Aluhlaza Tshoko Ukuba uAngel Wenza Ubukhohlakali loMnangagwa


Professor Madhuku
Professor Madhuku

HARARE - Igqwetha elimela uMnu. Eubert Angel, uSikhwicamfundo Lovemore Madhuku, uthi wayekwazi ayekwenza ngesikhathi ekhuluma labezindaba abeAl Jazeera.

UMadhuku utshele intathelizindaba eHarare namuhla ukuthi uAngel akaze athengise igolide okungekho emthethweni njengalokhu okuvezwa kufilimu yeAl Jazeera.

“Lizananzelela ukuthi lezi yizinto okunzima ukuziqonda ngoba lingaphili emhlabeni wokuthi imisebenzi yezobunhloli kuzwelonke, isebenza kanjani.”

Ngesikhathi esethulela intathelizindaba akuthunywe nguAngel, uMadhuku uveze njalo ukuthi bazathathelwa amanyethelo abe-Al Jazeera kanye labanye abantu abakhuluma kubi ngodaba lolu enkundleni zokuxhumana.

Kodwa uMnu. Timothy Sibanda, ohlala eHarare, uyayisola linkulumo kaMadhuku.

“Kutshengisela ukuthi vele njengelizwe asiyi ndawo, asiyi ndawo ngoba abantu baqakathekisa imali ukudlula konke. Ye yi-profession yakhe sibili uyavunyelwa ukukhuluma khona lokho kayaliswa kodwa lokhuyana kusobala ukuthi izimali njalo legolide kuyantshontshwa kuleli lizwe.

So yena nxa esitsho njalo, ye ngumsebenzi wakhe engayenza kodwa hayi kuyasolisa kakhulu.”

UMnu. Bekezela Gumbo, okunhlanganiso yeZimbabwe Democracy Institute, laye uthi

“Kuyilizwe elilozibuse sibili kade kumele ukuthi nga bonke laba abantu abaphuma kuDocumentary ngabe bayehla ezikhundleni ngoba bayangisile, uzulu wonke eZimbabwe langaphandle kwelizwe ngeCorruption engaka, igolide elingaka ma liphuma elizweni kulabantu abalidizevayo belamba bephiwa imali ezingatsho lutho, bephiwa imali ezingahlanganisi lutho.

Amatisha, ma-war veteran, amasotsha konke lamadokotela bephiwa imali ezingahlanganisi lutho. Bekufanele ukuthi nga abantu bonke laba bayayehla, bekumele ukuthi nga bayayehla kulezondawo, kuyilizwe eliseselomthetho, i-rule of law.”

Umqondisi wenhlanganiso ye# This Constitution, uNkosikazi Abigail Mupambi, uthi akudingakali ukuthi kwethuselwe abantu ngokuthi bazothathelwa manyathelo njengalokho okutshiwo nguMadhuku.

“Ma kuyikuthi balakho abafuna ukuthi bakuchasise khonokho okuchasiswa nguProfessor Madhuku, khathesi ukuthi hayi, hatshi besiku-operation eye intelligence, akuzange ke kube mhlawumbe lomcabango kumbe le-smuggling yona leyo ekhulunywayo, kabachasise kucace ebantwini.

Engingavumelani lakho mina yikuthi kukhanye sekungathi mhlawumbe sekuyethuselwa abantu. Siyabe sesicabanga ukuthi hayi, ngempela kukhona okutshaya amanzi.”

UMnu. Charles Nyoni, olwela ilungelo likazulu, uthi kuzwisa ubuhlungu okwenziwa yiziphathamandla zikahulumende labahuquluza umnotho welizwe.

“Kahlekahle ubusela balapha eZimbabwe sobu-common okokuthi akuseseyibusela sekuyinto nje esijwayelekile okokuthi vele sesimelele ukuthi iZIMSEC layo ifake iCorruption lokuntshontsha lobugegenga kube yiCurriculum yabantwana besikolo kuvele kufundiswe esikolo ngoba akusela meaning osokwenzakala. Ngoba khathesi sebezama ukuphica uzulu sebesithi sizobopha abantu abakhuluma ngodaba lolu, sizakwenzani sizasebenzisa umthetho, kwathini thini. Kodwa indaba leyi isaqalisa bake bathi hayi ngamanga basuka bathi sebefrize ama-asserts khathesi sebephenduka sebvesithi hayi kwakuyi operation esasiyenza, kubuhlungu ukuba ngumntwana weZimbabwe.”

Asenelisanga ukukhuluma loMnu. George Charamba, isikhulumeli sika Mnangagwa obengaphenduli umakhalekhukhwini.

Abebandla leCitizens Coalition for Change bathi yikhona bezokwethula umbiko wabo phezu kwaloludaba. Amapholisa eZimbabwe athi asehlolisisa udaba lolu njalo ibhanga elikhulu lelizwe eleReserve Bank of Zimbabwe selivale ama-bank accounts abanye okuthiwa bancedisa ukuba kutshontshwe igolide leZimbabwe elithengiswa kwamanye amazwe, agoqela eleDubai.

XS
SM
MD
LG