WASHINGTON DC - Umsakazo weAl Jazeera wethule ihlandla lokucina lefilimu yawo eveza inkohlakalo ekuhuquluzweni kwegolide leZimbabwe ngoLwesihlanu njalo lumsakazo uth okuvele sobala yikuthi uMongameli Emmerson Mnangagwa lomkakhe uAuxillia, bathinteka kabanzi kuloludaba.
Ihlandla leli litshiye uzulu ethukuthele njalo ebuzana ukuthi kungenziwani kahle-kahle ukuze kuqedwe ukuhuquluzwa kwenotho yelizwe.
Isikhonzi sikaMnangagwa uMnu Uebert Angel uphuma kuhlandla leli ekhuluma loNkosikazi Mnangagwa ecingweni ebuza ukuthi labo ayecabanga ukuthi yizigilamkhuba zakweleChina ezazisithi zilemali engcolileyo ezifuna ukuyiletha eZimbabwe, kuzamele zisebenzise indizamtshuna yazo yini ukuletha leyomali kumbe zizasebenzisa ekaMnangagwa.
UNkosikazi Mnangagwa uphendula esithi uAngel kumele abuze uMnangagwa ngokwakhe.
UAngel uphuma etshela njalo intathelizindaba zeAl Jazeera, zona ezazimcupha zizenza izigelekeqe zaseChina, ukuthi kumele lezi zigelekeqe zibhadale uMnangagwa imali engena kunkulungwane ezingamakulu amabili aseMelika, US$200, 000 ukuze zibonane laye uMnangagwa.
Ihlandla leli liveza njalo omunye ekhuluma ngokuthi uNMkosikazi Grace Mugabe wayehuquluza amadayimana eZimbabwe ephuma lawo ngendizamtshina uMugabe engakwazi esiyawathengisa eDubai kanje lempondo zendlovu.
Asenelisanga ukukhuluma loNkosikazi Mugabe kanye lemuli kaMnangagwa.
Lanxa kunjalo, abantu abanengi bathukuthele ngabakubonileyo njalo abanye bathi uMnangagwa kumele axotshwe embusweni.
“Sibuhlungu ngoba imali yonke leyo elingana legolide eliphumileyo, ingakha izibhedlela, ibhadale izisebenzi zikahulumende, ilungise imigwaqo yonke edilikileyo,” kutsho umsekeli wesikhulumeli sebandla leCCC uMnu Felix Mafa.
UMafa ukhuthaze uzulu weZimbabwe ukuthi avote ngobunengi kukhetho oluzayo ukuze kukhitshwe uMnangagwa lebandla lakhe leZanu PF embusweni.
Kodwa obona ngokuqhutshwa kwenhlelo kubandla leZanu PF uMnu Ober Mpofu uthe yiAl Jazeera ngamanga aluhlaza.
UMpofu walile ukukhuluma leStudio 7 kabanzi ngaloludaba esithi, “Vele angikaze ngikulalele khonokho njalo angisoze ngikulalele. Vele angikhangeli izinto zamanga mina.”
Umsekeli wesikhulumeli sebandla leZapu uMnu Brian Ncube yena uthe kudala inotho yeZimbabwe ihuquluzwa ngabantu beZanu PF lalabo abalobudlelwano lalelibandla.
“Akuqali namuhla njalo akuqali ngeGold Mafia le, into le ibisenzakala okweminyaka engamatshumi amane edluleyo,” kutsho uNcube ekhuluma leStudio 7.
Amazwi kaNcube agcizelelwe yingcwethi kwezombusazwe efundisa zona ezombusazwe leze-philosophy eWits University kweleSouth Africa uDr. Jethro Mpofu.
“Khonokhuyana okubonakeleyo akusilutho, laphana iAl Jazeera isivezele nje okuncane okwenzakalayo, iqiniso yikuthi kunengi okwenzakalayo behuquluza umnotho,” kutsho uMpofu.
UMpofu wengeze wathi umkhulu umsebenzi owenziwe yiAl Jazeera, ngakho uthe ingqobe isisezandleni zabantu beZimbabwe ukuthi bathathe amanyathelo.
Abanye abaphatheka kufilimu le ababikwa bezingqungquthela ekwebiweni kwenotho yeZimbabwe njalo abathi badla loMnangagwa bagoqela uMnu Kamlesh Pattni, Alistair Mathias, loEwan McMillan.
