Elinye ilunga lephalamende yakweleBhilithani, uLoard Jonathan Oates, uselobele uhulumende walelolizwe ebuza ukuthi uzathatha manyathelo bani phezu kwesikhonzi sikaMongameli Emmerson Mnangagwa, uMnu Uebert Angel kulandela ukuphuma kwakhe kufilimu yeAl Jazeera eveza ukuthi ulesandla ekuhuquluzweni kwegolide leZimbabwe kanye lekungenisweni elizweni kwemali engcolileyo etholakale ngendlela ezingaphandle komthetho.
UMnu Angela ulobuzwe bakweleBhilithani, icitizenship, njalo ubikwa elemali engena kuzigidi lezigidi kulelolizwe.
ULord Oates uthi ufuna ukuzwa njalo kuhulumende ukuthi uzathatha manyathelo bani phezu kwabanye abaphume kufilimu le elesihloko esithi Gold Mafia, bezikhulumela ukuthi bahuquluza njani igolide leZimbabwe.
Uthi uhulumende kumele aphenye loludaba njalo athathe amanyathelo aqinileyo ukuze kuvikelwe ukwebiwa kwenotho yeZimbabwe yizighilamkhuba.
Uhulumende weZimbabwe yena uthi usaphenya loludaba. Abanye abaphatheke kuloludaba bagoqela uMnu Kamlish Pattni, Rikki Doolan, Ewan Macmillan labanye.
Bonke laba bathi basebenza loMongameli Mnngagwa emisebenzini yenkohlakalo. Sixoxe locubungula ezombusazwe njalo ekhokhela inhlanganiso yezindaba eyeCite uMnu Zenzele Ndebele.
