WASHINGTON DC....................
Ele Zimbabwe limanyene lamanye amazwe womhlaba ukunanza usuku lokuqakathekisa ukulondolozwa kwemvelo emhlabeni jikelele ele Earth Day ngoMgqibelo mhlaka 22 Mabasa.
Leli langa labekwa yinhlanganiso yomanyano wamazwe womhlaba ngomnyaka ka1970 ngenhloso yokukhuthaza ukulondolozwa kwemvelo ukuze kungaphambanisi umkhathi.
Ingcwethi ezibona ngokulondolozwa kwemvelo zithi lanxa isisekelo sombuso sikubeka sobala ukuthi imvelo kumele ilondolozwe ukwenzela ukuthi singatshiyi sesiwonele inzalo yakusasa ngokuyitshabalalisa namhlanje, kusase kunengi okungenziwa ukuthi ikusasa yezizukulwane ibe nhle. Omunye walezi ngcwethi ngumnumzana Nqobizitha Ndlovu oligqwetha elibona ngokulondolozwa kwemvelo.
“Kumele kuqiniswe ukulandelwa kwemithetho yokulondoloza imvelo, bajeziswe labo ababonakala bebamba butshapha limvelo ngoba kungumthwalo womuntu wonke ukuthi silungiselele ikusasa enhle yabantwabethu lezizukulwane” kutsho uNdlovu.
