BULAWAYO - UNdumiso Vundla, owayengumgadli weqembu leHighlanders, uthi uthwele nzima ngomkhuhlane wamehlo.
UVundla, obesaziwa ngegama lokusoma elithi Tsuro, useleminyaka eyedlula elitshumi etholakale ukuba ulomkhuhlane wamehlo owe-glaucoma.
“Udubo lwamehlo lolu luqalise ekuqaleni kuka 2010 lapho engangisebenzela khona elizweni leSouth Africa. Luqale ngingananzeleli njalo lapho engaze ngabona khona ukuthi kukhona okungamanga kuhle lusuku lapho engathi ngisemsebenzini ngabona angani ngibona inkungu emini libalele. Ngithe sengiye emtholampilo ingcwethi zokwelapha zangitshela ukuba ngilomkhuhlane we-glaucoma.”
Uhlupho lwamehlo lolu ludale ukuba atshiye umsebenzi wokubalisa ayewenza khonale eSouth Africa wacina esebenza emahoteleni lasendaweni zokudlela kodwa lakho waphelelwa ngumsebenzi ngoba engasaboni kuhle. Ucine ephenduka ekhaya lapho afike wahlinzwa elinye ilihlo okwalenza laba ngconywana.
“Okwenzakalayo yikuthi elesandla sokudla kalisaboni ngitsho lakancane kodwa elesandla senxele lahlinzwa ngo2010 njalo ngiyabe ngibona nje lufifi. Umuntu kumbe imota nxa kuhamba ngiyabona ukuthi kukhona umuntu loba imota lapha kodwa angeke ngikutshele ukuthi lowu ngubani kumbe imota yakhona ngumhlobo bani.”
UVundla usephila ngokuthengisa izinto ezitshiyeneyo edolobheni lakoBulawayo njalo uthi ulesifiso esokufuya inkukhu ukuze anakekele imuli yakhe.
“Yinto engiyifisayo ukuba kube khona nje oyedwa loba ababili abangangisiza ngiqale inhlelo zokuziphilisa ezinjengokufuya inkukhu lami ngenelise ukuselela imuli. Ngitholakala kunombolo ezithi 0774 097 874 kumbe umuntu afike lapho engilomkambo wami khona ku13th Avenue loHerbert Chitepo duze lalapho okulendawo eyokubheja eyeMoors, yikho engiphila ngakho kulezinsuku.”
UVundla uzalelwe edolobheni leHwange ngo1979 njalo ufunde eSir Humphrey Gibbs, Embakwe kanye lasePlumtree High School. Uqale ukudlala umdlalo wenguqu ezikolo lezi njalo wangena kuqembu leHighlanders ngomnyaka ka1998. Ubeyingxenye yeqembu leHighlanders eliphakamise isicoco seligi kusizini ka1998/99 kanye lango2000.
Utshiye umdlalo wenguqu ngo2001 esesiya ekolitshini eliqeqetsha ababalisi eleHillside College waze waphenduka ebholeni ngo2003 esedlalela iqembu leHwange ngemva kokuthola indawo eyokufundisa kulelo dolobho. Uthi ulokhu elesifiso esokubuyela ayefundisa njalo eminyakeni eyedluleyo wenze izifundo ezokufundisa abantwana abakhubazekileyo.