WASHINGTON DC - Inhlanganiso emela abathengi, iNational Consumer Rights Association (NACORA) ithi ukukhuphuka kwentengo yezinto mahlayana okuqale ngoMvulo sokutshiye uzulu esidla luklubhu .
Idola leZimbabwe lalo liwile kakhulu nxa liqathaniswa leleMelika.
Emkambo wensitha idola leMelika elilodwa lithengwa ngamadola eZimbabwe aphakathi kwenkulungwane eyodwa elamakhulu ayisitshingalombili, Z$1,800 kusiya kunkulungwane ezimbili, Z$2,000.
Izinto ezikhwelileyo zigoqela isinkwa, sona esikhwele sisuka kuZ$1,200 saya kuZ$1,430. Okunye okukhwelileyo kugoqela impuphu lamafutha okupheka.
Ukukhuphuka kwentengo lokhu kuza ngesikhathi ilizwe lilungiselela ukhetho. Umbuzo omkhulu ngothi kambe lokhu kungaba lomthelela yini kundlela uzulu azavota ngayo kulolukhetho.
Isiphathamandla seNACORA uMnu Effie Dlela Ncube utshele iStudio 7 ukuthi kunzima ukuphendula lumbuzo ngoba sekukudala uzulu weZimbabwe ekhala ngokuthi uyancindezelwa yiZanu PF kodwa kungelatshintsho olubakhona.
