Nokuthaba Dlamani
VICTORIA FALLS - Inkokheli yamazwe awezwekazi leAfrica ithi ukuze kube lentuthuko kulel’izwekazi, kumele kube lokusebenzelana kwayo lokucebisana ngendlela zokudala imisebenzi engafinyelelwa ngabatsha kusetshenziswa indlela zakulez’insuku zebulenjini ukuze bazinakekele ngasikhathi sinye bethuthukisa amazwe abo.
Lokhu kuphume emhlanganweni oweTransform Africa, owenzelwa eVictoria Falls, wokuhlaziya indlela izwekazi leAfrica elingathuthuka ngayo lisebenzisa inkundla zakulez’insuku zebulenjini eze-internet technology, kwezamasiko, ezokulima, ezokwemba, ezempilakahle kanye lezinye.
UMongameli Emmerson Mnangagwa wethulele abazinkulungwane phose ezintathu kulumbuthano ukuthi ukuthunjwa kwamazwe la yikho okwawabisela emuva.
“Sekuthethe isikhathi eside ukuthi amazwe awezwekazi leAfrica lapha atholela khona uzibuse ukuthi abambisise indaba eziphathelane lezobulembu. Sakhangelela kakhulu impumela yalokhu emazweni angentshonalanga ahuquluza leli zwekazi. Silabo ontanga abalolwazi ngezobulembu ngakhoke kuqakathekile ukuthi sibanike amathuba okuthuthukisa amazwe ethu.”
UMongameli Haikande Hichilema wakwele Zambia, obesemhlanganweni lo, uthi inani elikhulu labasakhulayo kalilamisebenzi ngakho-ke kuqakathekile ukubahlomisa ngolwazi lwakulez’insuku olusebenzisa ubulembu, iTechnology.
“Ngalumhlangano kumele sikhumbuzane ukuthi kukho konke esikwenzayo, ngithanda ukulitshiyela ingqobe zokuthi kufuze sibelokuzimisela ngoba sisasalele emuva njalo, kufuze lokhu sikuhlanganise lezentuthuko ukuze sidale imisebenzi kwabatsha ababumba isilinganiso esikhulu senani labantu emazweni ethu.”
UMongameli Lazarus Chakwera wakwele Malawi ukhuthaze ukuthi amazwe la asebenze ndawonye ukuze izwekazi leAfrica lithuthuke.
“Ukuze sibe lengqubekela phambili njengezwekazi leAfrica yikuthi lathi sibambe intuthuko le ngokuphangisa. Okumbuzo wokuthi sikwenza njani lokhu, indlela ngeyokuthi sisebenze nzima lokuthi sisebenze sonkeni ukuze iAfrica izimele yodwa kwezentuthuko”.
UMswati nkosi yakwele Eswatini uMswati wesithathu uthe kufuze amazwe wonke eAfrica ayamukele ukuthi sekuphilwa esikhathini sokuthi yonke into isebenza ngobulembu.
“Sesiphila esikhathini lapha umhlaba osuguquka khona njalo indlela ohamba ngayo ilamandla ngezobulembu okuyinto eyayingazakali yikho iAfrica akufuzanga isalele emuva. Ukuze siqhubekelephambili, kufuze sikwamukela lokhu kanye lezizukulwane ezilandelayo emhlabeni lo esiwukhonzileyo.”
Umhlangano walonyaka owesithupha oweTransform Africa, wenzelwa ehoteleni eyeElephant Hills, eVictoria Falls okwakuqala ukuthi wenzelwe phandle kwele Rwanda, phansi kwendikimba ethi “Connect, Innovate and Transform”.
Ungenwa ngabantu abazinkulungwane ezintathu - 3,000, abampathintambo abangamatshumi amane - 40, ingcwethi zemitshina yangalez’insuku eyebulenjini eze-technology, omongameli bamazwe amahlanu abalisa iZimbabwe, Malawi, Zambia, eSwathini leRwanda.
Lumhlangano oqale NgoLwesithathu ugqitshwa ngoLwesihlanu.