HARARE - Umkhokheli webandla eliphikisayo eleCitizens Coalition for Change (CCC), uMnu. Nelson Chamisa, ukhangelelwe ukuba uzakwethekelela amazwe ambalwa akumanyano weSouthern African Development Community (SADC) leAfrican Union (AU) lapho azaxoxisana lenkokheli yamazwe la ngokubhekane lokhetho oluzakwenziwa lonyaka eZimbabwe.
Isikhulumeli seCCC, uMnu. Ostallos Gift Siziba, uthi kuqakathekile ukuba uChamisa ethekelele amazwe akumanyano lo ngoba kunengi okubahluphayo ngokhetho oluzayo.
UMnu. Bekezela Gumbo, okunhlanganiso yeZimbabwe Democracy Institute, uyakusekela lokhu.
Eyinye njalo ingcwethi kwezombusazwe ezimeleyo, uMnu. Tjenesani Ntungakwa, uthi kumele uChamisa akhulume ngokujulileyo lenkokheli yamazwe akuzwekazi leAfrica ngodaba lokhetho oluzayo.
Kusenjalo, uSiziba uthi lokhu bedinga abazabamela kukhetho oluzaqhutshwa ngoNtulikazi kumbe ngoNcwabakazi lonyaka.
USiziba uthi kulabanye asebengenile ezigabeni ezitshiyeneyo kodwa akumelanga beqale okwamanje ukukhankasela ukhetho ngoba basahlolisisa amanye amagama abafisa ukuncintisa kukhetho.
“Thina silokujabula ngoba i-process yethu ikhethe abantu abatshiyeneyo, kulabatsha, bavela ku-student movement, kulabantu abavela kucivic society, kulama-labour activists kulama media practitioners abathatha ipentsheni abangene kwezombusazwe, kulama-war veterans akhethiweyo ngabantu abatshiyeneyo. Ungakhangela oMargaret Dongo bakhethwe ngabantu abanengi eMhondoro eMashonaland West khonangale. Kuyasivezela ukubana inhlanganiso isebantwini, inhlanganiso ngeyabantu.”