HARARE................
UMongameli Emmerson Mnangagwa, umsekeli wakhe umumzana Constantino Chiwenga, umahluleli weSupreme Court labanye abanengi babikwa beqhuba imisebenzi yenkohlakalo kuhlangothi lokwembiwa kweChrome e Zimbabwe. Lokhu kuvezwe yinhlanganiso eyenza uphenyo kwezenkohlakalo emazweni atshiyeneyo womhlaba, eye-The Sentry embikweni omkhulu abawethule lamuhla ekuseni.
Umbiko oweSpincash, ngowesibili phakathi kwenyanga ezimbili obika ngokuphatheka kwemuli kaMnangagwa lezihlobo labangane bakhe kunkohlakalo eyenzakala eZimbabwe, kuhuquluzwa umnotho welizwe.
Ingcwethi ecubungula ezomnotho umnumzana Masimba Kuchera uphe umbono wakhe ngombiko wabe The Sentry olesihloko esithi- Spincash, ethi kulusizi ukuba imisebenzi yenkohlakalo elizweni iqhubeka ikhomba kunkokheli yelizwe.
“Uzakhumbula ukuthi kunsukwana ezisanda kwedlula besikhuluma, uMinister of Finance esithi yena kule-corruption enengi ekuthengisweni kumbe ekuthengeni kwezinto kuhulumende. So ngibona njengani indaba leyi eye-corruption isibuya ku-mining isibuya ku-agriculture. Kanenginengi sikhuluma siyayilwisa i-corruption sikhuluma ngomlomo nje siyichothoza kodwa khathesi sekumele sibone ukuthi labo abephula umthetho kumele babotshwe.”
UMnu. Effie Dlela Ncube, owenhlanganiso ebona ngezamalungelo abathengi ye-National Consumer Rights Association - NACORA uthi eleZimbabwe libulawa yinkohlakalo.
“Njalo igxilile okumangalisayo ilempande ezitshonayo iyaqansa iye khonale emahofisini amakhulu yingakho ke ilizwe lingasoze livuke noma sekutheni ngokuba labo abafanele ukuthi balakhe ilizwe bayalintshontshela ilizwe. Kukhulunywa ngokuthi ilizwe lakhiwa ngabanikazi kanti ke ilizwe lintshontshelwa ngabanikazi. Okwenzakalayo yibusela kubulala ilizwe ngenkohlakalo ngakho akulalutho oluzaguquka ezimpilweni zabantu, akula misebenzi eza ezadalwa ezomnotho azisoze zivuke, akula lutho oluzalunga ubusela busesengaka.”
Isikhulumeli senhlanganiso elwela amalungelo ababalisi abafundisa emaphandleni ye Amalgamated Rural Teachers Association in Zimbabwe-ARTUZ umnumzana Thembakuye Moyo laye upha umbono wakhe ngalumbiko.
“Indaba yeSpincash leyi iyasivezela nje ukuba asilazinkokheli, uPresident ugangile enkohlakalweni, uVice President ugangile enkohlakalweni, pho ngubani oqotho?. Siyakhala kumanje bona kabakhali bayabanjiswa and babanjiswa imali yenkohlakalo. Ofuna ukukhuluma loPresident kumele avale owengwenya, ofuna ukwenza i-deal lezokugejwayo kumele avale owengwenya, khonapho kuvalwa uPresident. Kuyasidanisa kakhulu njengeARTUZ ukuthi siya ngaphi lenkokheli ezinje.”
Omunye wabalwela umbuso wentando kazulu uMnu. Charles Nyoni uthi okwenzakalayo kuveza sobala ukuthi uhulumende kaMnangagwa katshiyananga ngitsho lakancane lokamuyi umnumzana Robert Mugabe.
“Bavela uMugabe esasakhona bentshontsha bebona ukuthi iZimbabwe ilenotho njalo ilezinto ezinengi abangakwanisa ukuzenza ukuthi bathole imali. Baqhubeka nje ngokuthi bakhipha uMugabe kabaselaye umuntu obayalisayo kumbe umuntu abaripota kuye sebayibo abayenza le into okusegcekeni vele ukuthi indaba zamaGold Mafia zaboSpincash lezi yikho nje zikhanya zile First Family, ekhokhelwa nguPresident kanye lomfazi wakhe labantwana bakhe bonke be-involved. ”
Ababethiweyo kulumbiko wabe The Sentry, ukuba baphatheke kule inkohlakalo emsebenzini wokwembiwa kweChrome, bagoqela usomabhizimusi waseSouth Africa umnumzana Zunaid Moti, eZimbabwe kuloMongameli Mnangagwa lemuli yakhe ikakhulu indodana yakhe uEmmerson Mnangagwa junior, umsekeli kamongameli, umnumzana Constantine Chiwenga, umnumzana Lishon Chipango, umahluli uJustice George Chiweshe, umnumzana Kudakwashe Tagwirei labanye.
Imizamo yokuthola abogatsha lwezokwenjiwa kwamatshe aligugu elizweni, ibe lephutha njengoba unobhala walo umnumzana Pfungwa Kunaka ubengaphenduli imibuzo ayithunyelweyo. Isikhulumeli sekomishini ebona ngezenkohlakalo elizweni eye Zimbabwe Anti Corruption Commission, uNkosikazi Thandiwe Mlobane utshele iStudio 7 ukuthi bona abakawutholi umbiko wabe The Sentry ngakhoke bangazake batsho lutho okwakhathesi ngawo.
Kodwa umpathintambo wezokwethulwa kwemibiko uNkosikazi Monica Mutsvangwa utshele uzulu ngemva kokuphuma kweDocumentary yabe Al Jazeera, eye Gold Mafia, ukuthi kuzamele bajeziswe bonke abaphatheka kumisebenzi yenkohlakalo kodwa kuze kube manje akekho osethe wabotshwa owaphunyiswa kuyo.