WASHINGTON DC - Kulandela ukukhonona kwabantu abanengi, uMongameli Emmerson Mnangagwa wesule iziqondiso azethule ngoLwesithathu ebezisithi uhulumende akaseyikwazisa uzulu ngokusetshenziswa kwemali yakhe kunhlelo zempilakahle ezifana lokuthenga izimota ezithwala izigulane, imithi yezibhedlela lokunye okokusebenzisa.
Uzulu uhlabe umkhosi kulandela ukufakwa kweziqondiso lezi kugwalo lwemithetho olwe-government gazette.
Inengi belisithi uhulumende uzama ukufihla ukutshaphazwa kwemali kazulu kanye lemisebenzi yenkohlakalo engaba isenziwa yiziphathamandla zakhe, efana laleyo eyabangela ukuxotshwa kowayengumphathintambo wezempilakahle uMnu Obadiah Moyo umsebenzi.
Kodwa unobhala omkhulu ehofisini kaMnangagwa uMnu Misheck Sibanda uthe uzulu kumele atshaye iziqondiso lezi indiva ngoba zifakwe kugwalo lwemithetho uMnangagwa engakwazi.
Ngokunjalo, uthe azikho emthethweni. USibanda uthe uhulumende uzaqhubeka esazisa uzulu ukuthi usebenzisa njani imali kunhlelo zempilakahle njengalokhu obekuvele kusenzakala.
Wengeze wathi basaphenya ukuze babone ukuthi iziqondiso lezi zivele ngaphi uMnangagwa engakwazi.
Kodwa ocubungula ezombusazwe njalo eyisiphathamandla senhlanganiso yeBulawayo Progressive Residents Association uMnu Ambrose Sibindi uthi uhulumende usezama ukucatsha ngomunwe.
