Ibandla eliphikisayo kweleSouth Africa eleAfrica People First lithi selilobele incwadi lelo elibusayo kulelolizwe eleANC, inhlanganiso yeOperation Dudula lezinye ezilwela ilungelo loluntu zikhalaza ukuthi kube lemhlangano eyokuzazisa ukuthi ziphathe ngesineke abantu abavela koMthwakazi eZimbabwe, abakulelolizwe abadinga ubuphepheli ngoba behlukile kulezinye iziphepheli.
Lokhu kuvezwe ngumholi walelibandla uMnu. Muzi Hlengwa, yena otshele iStudio 7 ukuthi bahlangene ngoMvulo lomphathintambo kahulumende weSouth Africa obona ngokwenzakala elizweni uMnu. Aaron Motsoaledi bavumelana ukuba abantu beMaNdebeleni abalama permit asephele kumbe asezaphela imvumo yokusebenza kuzamele bayewavuselela kundawo zama kiosks asesunguliwe ukwenza lumsebenzi.
Abalabantwana abalabazali abadabuka esigabeni sika Mthwakazi abazalelwa kwele South Africa asebeleminyaka elitshumi lasithoba minwe mibili balelungelo lokuyabhalisa ukuba yizizalwane zakwele South Africa, ama citizens.
Kodwa isikhulumeli sikaMnu. Motsoaledi, uMnu. Siyabulela Qoza utshele iStudio 7 ukuthi uMnu. Motsoaledi wayekhuluma okusemthethweni weSouth Africa. okungenziwa ngumuntu wonke, hatshi abakoMthwakazi kuphela ngoba wonke umuntu elandela umthetho ofanayo.
UMnu. Qoza uqhubeke wathi kudaba lwalabo abale 18 years, uMnu. Motsoaledi wayekhuluma ngesinqumo somthethwandaba njalo iloba ngubani engayidinga imvumo ye citizenship.
UMnu. Hlengwa, ongukhansila weThekwini, uthi sebabumba umanyano weMthwakazi Forum belamanye amabandla ezombusazwe adabuka eMatabeleland, njalo elakuqala kwakungele Republican Party of Mthwakazi, kwasekulandela amanye agoqela eleMthwakazi Republic Party, kodwa kuvele kuluhlelo olwasungulwa ngabakhokheli bomdabu abakoMthwakazi labe South Africa.
Asizweni uMnu. Hlengwa exoxa kabanzi ngaloludaba kungxoxo loSithandekile Mhlanga weStudio 7.
