Ugatsha lukahulumende olwe Financial Intelligence Unit (FIU) luthi solwethule izijeziso ezalwethesa labo abakade bephenywa ukuthi bengabe baphatheka kudaba lwenkohlakalo olubikwa luvezwa ngumsakazo we Aljazeera ngoba kungatholakanga ubufakazi obuveza ukuthi badala icala.
Embikweni owethulwe izolo ntambama, ugatsha lolu luthi lusebenze ndawonye lamapholisa ukucubungula amahlandla amane omfanekiso weAljazeera olesihloko esithi “Gold Mafia” kanye lokusetshenziswa kwezimali zalabo abaqanjwa kulumfanekiso kodwa abatholanga lutho oluxhuma limali lenkohlakalo.
Ngalokho, ugatsha lolu luthi solusethula isijeziso esalwethesa abantu labo ekupheleni kwenyanga edluleyo njalo lokhu akwenqabeli abomthetho ukuthi beqhubeke bephenya loludaba nxa befisa.
I-FIU ithi izaphathisa labo abafuna ukuqhubeka bephenya, abagoqela abakwamanye amazwe lapho okuthiwa imali le yafika kumbe yathathwa khona.
Izolo, usomlomo wedale lephalamende uMnu. Jacob Mudenda wenqabele amalunga alelidale ukuthi akhulume ngaloludaba esithi ngumlandu wamapholisa lababona ngezenkohlakalo elizweni.
Ukuhlaziya loludaba, uSithandekile Mhlanga weStudio 7 uxoxe loMnu. Dumisani Nkomo, ingcwethi ecubungula ezomnotho welizwe.
Siphinde saxoxa lomunye njalo ocubungula ezombusazwe, uMnu. Siphosenkosi Matshokomole Bhalule.