BULAWAYO - Bakhathazekile abalandeli beqembu leHighlanders ngokwehluleka kwalo ukulitshayela emambuleni kumidlalo esanda kwedlula.
Umlandeli weqembu leHighlanders uWashington Sibanda uthi kuzamele emidlalweni elandelayo abaqeqetshi beqembu leHighlanders baphe abanye abagadli abatsha ithuba.
“Impumela leyi eyemidlalo asebeyidlale leqembu leSheasham kanye leleSimba Bhora ephele ingutshiki lobhanqa 0 ka 0 itshengise ukuba iqembu leli kalilabo abadlali abayeneleyo ngoba phambili kubuthundu.
Sesingasola abagadli yebo kodwa bakhona yini abadlali abayenelisa ukuphakela abagadli amakhekhe njalo labo abagadli bakhona bayenelisa yini ukuvulela kuhle ibhola.
Umlandu usukumqeqetshi uBrito labanye bakhe ukuba baphe ithuba abanye abadlali ukuba bazibonakalise,” kutsho uSibanda.
Umlobi wendaba zemidlalo uPraise Dumisani Dlakama laye uthi ukungasebenzisi amathuba yikho okulahlisa iqembu leHighlanders.
“Ungakhangela iqembu leHighlanders liyawathola sibili amathuba kodwa bayehluleka ukuba baqedise. Kutsho ukuba inkinga asiyo ukuba abadlali bayehluleka ukuthola amathuba kodwa bayehluleka ukuwasebenzisa njalo kumele kulungisiswe ke khonokho.
Ungakhangela amaqembu afana laboManica Diamonds kanye leNgezi Platinum bayasebenzisa amathuba abawatholayo manje kuHighlanders ama corner kick kanye lama free kick abawasebenzisi wona engezinye indlela zokuhlohla.
Ngibona angani lokhu bengakulungisisa ngokuthola abadlali abangayenelisa ukusebenzisa amathuba,” kutsho uDlakama.
Ekhuluma ekupheleni komdlalo weqembu lakhe leleSimba Bhora ngeSonto edlulileyo, umqeqetshi weqembu leHighlanders uBaltemar Brito uveze ithemba elokuba amagoli ayeza kumidlalo elandelayo.
“Abadlali bethu bazame konke okusemandleni abo ukuthi bahlohle kodwa kabayenelisanga. Thina njengabaqeqetshi kuyasithokozisa ukuba siwatholile amathuba awokuhlohla ngoba nxa amathuba esiba khona kutsho ukuba okulandelayo yikuba silitshayele emambuleni,” kutsho uBrito.
Iqembu le Highlanders lihlezi endaweni yesibili engalaneni yemiklomelo lilemiklomelo elitshumi lesithupha ngemva kokudlala imidlalo eyithoba minwe mbili.
Phezu kwengalane kuhlezi iqembu leNgezi Platinum Stars lona elilemiklomelo elitshumi lasikhombisa ngemva kwemidlalo eyithoba munwe munye.