HARARE..................
Uhulumende weZimbabwe uthi umatasatasa ngokulungisisa udubo lokubhaliswa kabili kwentatheli lapho ziqhuba umsebenzi wazo wokuthapha izindaba eziphathelane lokhetho.
Lokhu kuvezwe ngumsekeli kamphathintambo wezokwethulwa kwemibiko uKindness Paradza emhlanganweni obuqoqwe ngabe MISA Zimbabwe wokubonisana ngamalungiselelo entathelizindaba emsebenzini wazo ngesikhathi sokhetho olukhulu lwalonyaka.
U Paradza uxwayise intathelizindaba ukuba zisebenze zilandela umthetho njalo zingaze zaya lapho ezinganxunswanga khona.
“Lingaze laya lapho elinganxunswanga khona.”
Unobhala jikelele wenhlanganiswo yentathelizindaba eyeZimbabwe Union of Journalists-ZUJ uPerfect Hlongwane uveze ukukhathazeka ngamazwi kaParadza okuthi intathelizindaba kumele ziye emikhosini lapho eziyabe zinxunswe khona kuphela.
“Phela thina sinxunswa yisisekelo sombuso, yiso esisinxunsayo njengentatheli. Ngoba phela khumbula ukuthi sililihlo siyindlebe njalo yomphakathi ngakho ke konke lokho okwenzakalayo kufanele ukuthi sazise umphakathi kodwa siyazi thina ukuthi nxa sikhuluma ngalokho esingathi thina nfgesiNgisi yi-Private function, siyakwazi ukuthi kumi njani. Kodwa amalunga wonke asemawofisini esingathi thina ngamawofisi omphakathi i-public kufanele ukuthi sibe kwazi ukuthi kwenzakalani ngoba kanenginengi basebenzisa imali zomphakathi ukuthi bayenze lezonhlelo.”
Esekhuluma ngamalungiselelo okhetho olukhulu lwalonyaka lokuvikeleka kwazo uHlongwane uthi usasekhona umsebenzi kulolohlangothi.
“Esikubonileyo yikuthi asikalungeli kunengi okumele sikwenze ukuthi intathelizindaba zethu zibe ngezivikelekileyo kulolo dlame. Amabandla ezombangazwe sesiqalisile ke uhlelo lokuthi sikhulumisane labo. Uzakhumbula ukuthi esikhathini esingatsho lutho esedluleyo, besikhuluma lamapholisa, okwakhathesi sesikhulumisana lamabandla ezombangazwe ukuthi labo bazinikele ukuthi hayi, intathelizindaba aziyikuhlukunyezwa, intathelizindaba aziyikubanjwa ngamandla lapho ziqhuba umsebenzi wazo. Ngakho ke njengoba ngitshilo, umsebenzi usesekhona.”
Enye intathelizindaba ebikulomhlangano u-Leopold Munhende uchasisa ngenkinga ezinengi ezibhekane lentathelizindaba.
“Kufuze kube lethiwa yiNational Employment Council ehle ikhulume ikwenze kube segcekeni ukuthi intathelizindaba zihola imali engakanani, azivunyelwa ukuhola imali ephansi kwengakanani. Kungenziwa lokho kuzasinika lathi amandla ukuthi hayi sesihola imali ezwayo. Even ingekho nengi kakhulu kodwa ingani iyahlonipheka lathi singasebenza ngcono.”
Amapholisa aweZimbabwe Republic Police, lawo akade ekulumhlangano athi sebelulungele ukhetho lwalonyaka njalo sebelindele ukuzwa uMongameli Emmerson Mnangagwa lapho azobetha khona usuku lwankona. Isikhulumeli samapholisa uAssistant Commissioner Paul Nyathi ulandisa ngamalungiselelo asebewenzile.
“Amapholisa eZimbabwe Republic Police khathesi bathanda ukutshela uzulu ukuthi usikomitshi jikelele owamapholisa uCommissioner General Matanga usefake iCommittee esithi thina yeZimbabwe Republic Police 2023 Zimbabwe Harmonised Committee. I-Commitee leyi bazahamba kumbe bazabhoda elizweni lonke bekhuluma lama-Police Commanders ukuthi basebenze kuhle lentathelizindaba kungaba le-problem, sonke sihlale phansi sikhulume. So sicela kakhulu intathelizindaba lama-political parties ukuthi bahlangane bakhulume leCommittee leyi.”
U-Nyathi uthethe lelithuba njalo ukuxwayisa abezombusazwe ukuba bananzelele indlela abaziphatha ngayo kanye lenkulumo zabo ukuze zingaze zaba yizo ezibangela ukuqhamuka kodlakela elizweni.
Esinye isiphathamandla seZimbabwe Media Commission, uMnumzana Academy Chinamhora, uthi lanxa kulenkinga ezinengi ezifana lokuswelakala kwempahla yokusebenzisa, babona sengathi intathelizindaba zilungiselele kuhle ukuloba ngokhetho lwalonyaka. UMnu.Chinamhora uphinde wathi kusukela kukhetho luka-2013 kuze kube khathesi sekulamaphephandaba, imisakazo, umabonakude kanye lamaphephandaba ebulenjini be Internet, okuzokwenza wonke amabandla azaphatheka kukhetho azathola ithuba lokuzikhankasa kumbe ukuxoxa indaba zawo.
IZimbabwe ikhangelelwe ukuthi ibe lokhetho lukamongameli, iphalamende kanye lamakhansili ngoNcwabakazi lanxa uMongameli Emmerson Mnangagwa engakalubeki usuku lwalolukhetho.
Kodwa abanye abalwela amalungelo oluntu kanye lamabandla aphikisayo bathi imithetho efana leData Protection Act kanye leFreedom of Information Act ivimbela umsebenzi wentatheli.
Umhlangano walamuhla owenzelwe eweteleni yeMonomutapa eHarare, ungenwe ngabameli bamabandla ezombusazwe agoqela iZanu Pf, Citizens Coalition for Change-CCC labe MDC-T. Abaphephetha izindaba labo bebekhona emhlanganweni lo kanye labasesipholiseni lababona ngokubhaliswa kwazo intathelizindaba abeZimbabwe Media Commission.
Ababona ngokuqhutshgwa kokhetho elizweni abeZimbabwe Electoral Commission abazange babuye lanxa bebenxunsiwe. Ngakolunye udaba olufanayo, lamuhla koBulawayo inhlanganiso yeZimbabwe National Editors Forum ibambisane leVoluntary Media Council of Zimbabwe bebexoxa ngokhetho oluzayo luka-2023 kanye labahleli mayelana lokuziphatha kwentathelizindaba kanye lokhetho lemithetho yentathelizindaba njengoba intathelizindaba zidlala indima eqakathekileyo ezinhlelweni zokhetho.
