BULAWAYO - UDan Ngwenya, oqeqetsha abatsha kumaqembu abasakhulayo aweqembu leHighlanders, uthi uzwa ebusiseka kakhulu nxa esebenza labantwana.
UNgwenya uqale ukuqeqetsha eleminyaka engamatshumi amabili lathoba minwembili njalo lonyaka usefikise iminyaka engamatshumi amabili engumqeqetshi.
“Ngalimala idolo ngahlala isikhathi eside ngingadlali kwathi ngemva kokusila kwami (ngo1996) iqembu langiboleka iEpoch Mine ndawonye loNetsai Moyo, Dumisani Ngulube kanye loBilly Daka. Ekuphendukeni kwami ngaqhubeka ngizilolonga labanye kodwa kangizange ngidlale kangako ngoba idolo layala lilokhu lingihlupha ngaze ngatshiyana lokudlala ngaqala ukufundela ukuqeqetsha ngo2003.”
UNgwenya usebenzele inhlanganiso yeGrassroots Soccer, okuyiyo eyenza kwasungulwa iqembu leBantu Rovers, iRising Stars eyayibunjwe nguAgent Sawu kanye lesikolo seSt. Thomas kwathi ngemva kwalokho wabizwa liqembu leHighlanders.
“Kusukela ngo2011 ngisebenze loDumaza Dube njalo nxa singatshayi inja sifihla umphini nguye umuntu ongifundise ibhola. Yebo kambe bengilazi ibhola njengomdlali kodwa uDumaza nguye ongifundise ibhola njengomqeqetshi njalo lalamhla lokhu nja ngikhuluma ngaye ngizitshaya isifuba ngaye.”
Abanye abadlali abadlule ezandleni zikaNgwenya abadlala kuzinga laphezulu ngababalisa uTeenage Hadebe odlala eMelika, umvimbi weFC Platinum uLawrence Mhlanga, abadlali beqembu leHighlanders uGodfrey Makaruse, uArchiford Faira labanye. Uthi yena uyabusiseka kakhulu nxa esebenza labasakhulayo ebabona bephakama baze becine bedlala kuzinga laphezulu.
“Wonke umuntu empilweni uyafuna ukukhula, akula muntu ofuna ukuhlala ephansi. Mina kodwa ngothando engilalo olokusebenza labafana abancane ngiyasuthiseka ngalapho engikhona.
Ukukhula ngiyakufuna sibili kodwa angeke ngilunge nxa ngingatshiya laba abancane. Ngiyabe ngibafundisa ukudlala ngibe sengibadlulisela kwabanye.”
UNgwenya nguye oqeqetsha abafana abaleminyaka engaphansi kwelitshumi lantathu kuqembu leHighlanders njalo usebenza loSiza Khoza kanye loSmart Moyo.
Baphinda njalo kube yibo abancedisa uMelusi Sibanda kuqembu leBosso 90 lona elikhankasa kusigaba seSouthern Region Division One Soccer League.
Forum