WASHINGTON DC – Uhlelo lokubhalisela ukuvota kukhetho lokudinga amakhansila, amalunga ePhalamende kanye loMongameli welizwe, oluzaqhutshwa mhlaka 23 ngoNcwabakazi lonyaka lugqitshwa namuhla.
UMongameli Emmerson Mnangagwa wazise ngoLwesithathu ukuthi ukhetho luzakwenziwa ngalolusuku.
Umthetho uthi ukubhalisela ukuvota kumele kuphethwe ngosuku lwesibili ngemva kokwaziswa kwelanga lokhetho.
Lokhu kutsho ukuthi abazabhalisa sokwedlule usuku lwanamuhla abasoze benelise ukuvota ngoNcwabakazi.
Uhlelo lokuhlola amagama abazavota kuluhlu lwe-voters’ roll lona luphele izolo.
Amabandla ezombusazwe athi labo abalokhe bengakabhalisi kumele baphuthume namuhla ukuze benelise ukuvota ngoba ukhetho lolu lubaluleke kakhulu.
“Siyabakhuthaza abantu kuthi bahambe bayebhalisa amagama ukuze benelise ukuvota. Bahambe bayevotela inguquko elizweni ngoba abantwana beZimbabwe sebehluphekile kakhulu phansi kombuso weZanu PF,” kutsho uKhansila weCCC koBulawayo uMnu Edwin Ndlovu.
Ilunga leZanu PF koBulawayo uMnu Admire Masikati yena uthe, “Abantu abahambe bayebhalisa loba nje kungasela sikhathi. Abahambe bayebhalisa emahofisini eZEC.
“Kuqakathekile ukuthi bayebhalisa ukuze babe lomutsho ekukhetheni labo abazabakhokhela eminyakeni emihlanu elandelayo,” uqhubeke esitsho uMasikati.
Forum