Ekhuluma ngemva komdlalo weqembu lakhe leleChicken Inn, ophele iqembu leBlack Rhinos linqotshwe nge 1 ka nya, uChaminuka uthe abaqeqetshi sebangenwa ngumkhuba wokuqakathekisa ukuvala igedi bekhohlwa ukuba laphambili kumele balitshayele emambuleni.
“Kufuze sisebenze kakhulu ngokuhlohla ibhola. Nxa sizilolonga silungisise ukuba nxa singasondela duze kwegedi kuyini okumele sikwenze. Abadlali kumele babekwazi okokwenza nxa bengafika duze kwegedi, bathathe isinqumo esiqondileyo phezu kokuba bapasane kumbe umuntu azitshayele yedwa.”
UChaminuka uqhubekele phambili esithi ukungabi labadlali abaphekekileyo kuqalela ekukhuleni kwabo ngoba bengatholi imfundiso eyeneleyo.
“Lapho esiqalela khona yikho okunxele ngoba kunengi okusetshenziswa emazweni aphetsheya esingelakho kwelakithi. Kumele impahla esetshenziswa phetsheya kolwandle kanye lakwamanye amazwe asenyakatho lasezansi yezwekazi laseAfrica lathi sibe layo ngoba khathesi ibhola lethu kalifani lelabo ngenxayalokho.”
UChaminuka usanda kuqhatshwa liqembu leBlack Rhinos lona eliqhuba nzima lonyaka kusigaba seCastle Lager Premier Soccer League. Uthi lesosimo sizaguquka.
Iqembu leBlack Rhinos beliqeqetshwa nguStanford Stix M’tizwa ekuqaleni kwemidlalo yalonyaka njalo uChaminuka uqhatshwe ngenyanga kaNkwenkwezi ngemva kokuba impumela yemidlalo ibingekho mihle.
Iqembu leBlack Rhinos yilo elijeke amanye engalaneni yemiklomelo lilemiklomelo eyisithupha ngemva kwemidlalo elitshumi lambili.
Forum