BULAWAYO -- Sebedanela kumidlalo yesigaba sikaDivision One abalandeli bomdlalo wenguqu ngemva kokumiswa kwemidlalo yesigaba sePremier Soccer League.
Inhlanganiso yePremier Soccer League ikhuphe umbiko mhla ziyisikhombisa kuyonale inyanga kaNhlangula isazisa uzulu ukuba imidlalo isimisiswe kuze kube mhla lusuku lwakuqala olwenyanga kaNtulikazi.
Imbangela yokumiswa kwemidlalo yikuba kuqhutshwa imisebenzi yokulungisa inkundla yeNational Sports Stadium yona esetshenziswa yiwo wonke amaqembu aphuma esigodlweni iHarare.
Intathelizindaba yezemidlalo uPraise Dumi Dlakama, obebukele imidlalo eqhutshelwe enkundleni yeWhite City uthi leli lithuba elokuthi abadlali abadlala kusigaba sikaDivision One labo bebonakale.
“Njengoba imidlalo yePSL imisiwe siyananzelela namhla ukuba abantu babuye ngobunengi ukuzobukela imidlalo yeDivision One. Khona vele umncintiswano kuSouthern Region Division One iyachaza ngoba kuhlohlwa amagoli amanengi okwedlula kuPSL.
Khonokhu sekungadala ukuba abalandeli bebhora bahle bekhethe ukubukela imidlalo yeDivision One loba imidlalo yePSL isiphendukile,” kutsho uDlakama.
Kumidlalo edlalelwe enkundleni yeWhite City namhla iqembu leBosso 90 libe ngutshiki lobhanqa 1 ka 1 lele Mountain Climber kuthi eleTalen Vision libhaxabule eleEmakhandeni nge 5 ka nya.
NgaseLuveve iqembu leZPC Hwange linqobe eleAdachi nge 1 ka nya.
Kusenjalo abalandeli bomdlalo wenguqu balinde umdlalo omkhulu owokudinga iqembu elizintshantshu zezwekazi laseEurope oweUEFA Champions League ozadlalwa namhla ntambama phakathi kweqembu leManchester City elaseNgilandi kanye leleInter Milan elaseItaly.
Umsekeli weqembu leHighlanders uGodknows Ngwenya uthi yena isifiso sakhe ngesokuba eleCity kube yilo eliphakamisa inkezo.
“Mina ngibona angani iqembu leManchester City lizaphakamisa inkezo ngoba vele isifiso sami ngesokuthi uPep Guardiola athathe aqedelane lakho lokhu.
Ungakhangela vele indlela iManchester City edlala ngayo bavele basesimeni esihle esokuba bephakamise linkezo,” kutsho uNgwenya.
UGuardiola useke wayiphakamisa kabili inkezo yeChampions League ngesikhathi eqeqetsha iqembu leBarcelona kodwa ubehlala esehluleka ukuphinda eyiphakamise esengumqeqetshi weCity langesikhathi engumqeqetshi weqembu leBayern Munich.
I final yeUEFA Champions League izaqhutshelwa edolobheni laseInstabul kweleTurkey.
Forum